Segun Dr. Vassilaki, Investigador di Mayo Clinic:
ORANJESTAD (AAN)-- E tema di Salud Mental ta hayando hopi atencion cerca nos Institucionnan de Salud, Politico, Social, Fundacionnan, etc., y den nos comunidad en general, y den esaki e malesanan cerebral cu ta ocasiona Alzheimer, Demencia, tin su espacio.
Specialistanan, por ehemplo di Centro di Memoria, y docternan di cas, na dado momento ta splica e famianan con importante ta pa e pashent no stop di tuma su remedi di presion, esun di suco si ta resulta cu su glucose ta halto, su pildo pa cerebro, pasobra ta remedinan cu e mester, diariamente, pa biba miho y cu no por evadi.
Pero tambe tin algo hopi importante cu no por prescindi di dje, y esaki ta un bon alimentacion.
Un di e miho fuentenan di informacion cu por tin acceso na dje, ta e Mayo Clinic, y tocante alimentacion pa un hende cu e problema di salud menciona, pa proteha su salud cerebral y reduci e riesgo di avance di Alzheimer of Demencia, ta recomendable pa limita e consumo di vet, carni cora, y alimentonan duro cu por pega den e garganta di e pashent.
Mayo Clinic ta aconseha un patronchi alimenticio manera e asina yama “Dieta Mediteraneo” of dieta MIND pa faborece e funcion cognitive.
Dr. Maria Vassilaki, investigador den epidemiology di Mayo Clinic, a splica con e dieta mediteraneo cu ta consisti di hopi fruta, berdura, pisca, vet sano manera azeta di olive, menos carni cora y vet satura ta mustra di ta retrasa e signonan di e malesa di Alzheimer y demencia vascular.
Den un di e episodionan di “Mayo Clinic Minute”, cu ta dirigi pa periodistanan download, e ta splica: “Den e cerebro por mira cambionan cu ta relaciona cu e malesa di Alzheimer y Demencia, y un di nan ta esun yama ‘beta amiloide’ cual ta un fragmento proteico cu ta acumula den e cerebro. Nos a descubri cu e personanan cu ta cumpli estrictamente cu e dieta mediteraneo, of cu ta consumi mas berdura, ta menos propenso na tin cantidadnan grandi di beta amiloide den su cerebro”, Dr. Vassilaki ta splica. Esaki ta un potret di e Dokter.
