Judelca Briceño, Management Team di DVG:
- Entre 24 di Maart cu 30 di Juni
ORANJESTAD (AAN) Departamento di Salud Publico (DVG), IBiSA y WEB Aruba NV, a organiza un conferencia di prensa, den cual a anuncia un Encuesta bao nomber di “Kico Nos ta Come?” Funcionarionan di e tres entidadnan aki a participa den e conferencia di prensa aki.
Na prome lugar a hiba palabra señora Judelca Briceño di Management Team di DVG, ken a expresa cu esaki ta un dia hopi special, unda cu Departamento di Salud Publico, conhuntamente cu otro stakeholders, a anuncia un programa/proyecto, hopi importante den cuadro di nutricion di nos pueblo.
El a referi na e hecho cu na aña 2023 DVG a haci un encuesta yama STEPS Survey, den cual a haya un vista riba obesidad y sobrepeso na Aruba.
“E datonan di e encuesta aki a demostra cu 79% ni nos pueblo Arubano ta sufri di sobrepeso, di cual 46% ta wordo clasifica como obeso. Naturalmente e cifranan aki ta un indicacion, y ta hopi importante pa Departamento di Salubridad Publico, p’asina nos sigui, y bin, cu programanan pa wak con, conhuntamente cu comunidad di Aruba nos por ataca e problematica aki, pero tambe mitiga y evita e consecuencianan cu obesidad y sobrepeso ta bin cu ne”, señora Briceño a señala.
Den cuadro di e informacion aki, DVG a lanza Diaranzon un survey cu nan a yama “Kico nos ta come?” E ta un “Total Diet Study” (TDS). E ultimo datonan cu un TDS cu a wordo haci ha Aruba, ta data di aña 1993.
“Pues, despues di e resultado di STEPS Survey, DVG a haya importante pa haci uso di e datonan aki, y pa despues di tanto aña bin cu un estudio di importancia pa Aruba, bek”, señora Briceño a expresa, agregando cu esaki ta un estudio na unda ta bay haci un research; un estudio cientificamente unda DVG ta bay haya un miho bista di e contenido di nos nutricion. P’esey mes e yama “Kico nos ta come”, Judelca Briceño a agrega, y sigui bisa cu tin biaha nos ta nutri nos mes pero nos no ta conciente di kico asina e cuminda cu nos ta come ta encera, y kico ta e particulanan cu e ta consisti di dje.
“Na momento cu nos haya e resultado di e estudio aki y nos sa mas y nos sa mas tocante kico nos populacion ta consumiendo, e lo yuda DVG pero tambe otro stakeholders pa bin cu programanan di intervencion y maneho cu por yuda nos tambe, como gobierno y como departamento di gobierno, p’asina nos yuda nos hendenan hopi miho ainda, mas ‘to the point’ p’adapta nan nutricion pa uno mas saludabel”, Judelca Briceño a remarca.
E encuesta aki ta tuma lugar entre 24 di Maart y 30 di Juni 2025.
