Michella Lacle, Presidente Comision Plan di Mayor:
ORANJESTAD (AAN) – Presidente di Comision Plan di Mayor, Michella Steeenvoorde-Lacle, den entrevista cu DIARIO a indica cu un di e metanan di Plan di Mayor ta pa midi e efectividad di su trayectonan, intervencion, y tambe midi si den futuro ta bay tin menos caso di alimentacion.
Aworaki, segun Lacle, si wak por ehemplo e cifranan di Directie Voogdijraad, 1.309 mucha cada aña a busca nan derecho di alimentacion via Directie Voogdijraad, y 62% di e mayornan cu tin cu aporta esaki ta wordo forza pa cumpli cu nan obligacion aki. “Loke nos kier logra ta pa esaki baha, pa ambos mayor tuma nan responsabilidad sin cu nan tin cu wordo forza, pasobra nan ta wak e necesidad cu e mucha tin di wordo stima y cuida door di ambos mayor”, Michella Lacle a señala.
El a agrega cu e mucha ta consecuencia di decisionnan cu e mayornan ta tuma. Na momento cu mayornan ta separa for di otro, CBS ta mustra cu cifranan cu e entrada promedio di un mayor ta 2.200 florin, anto ban pone cu un pareha casa cu tin dos yiu y un ta bay for di cas e hogar ta perde 2.200 na entrada.
“Anto mayoria di biaha si e tata no ta contribui cu e entrada di e famia, e mama ta keda atras cu un entrada di 2.200 florin y dos yiu pa cria; esey no ta yega awendia. Nos bestands income a wordo calcula pa un famia cu dos yiu, na 3.200 florin of algo similar. Pues, e no ta yega. E mama mester bay haci mas trabao pa e por pone pan riba mesa, anto cu tur e consecuencianan cu esaki ta trece cu ne”, Steenvoorde-Lacle a relata, agregando cu si ambos mayor tuma nan responsabilidad e ora ey, e yiunan ta wordo miho sirbi, no financieramente so, pero mas importante ta cu e mucha cu e mayor cu ta bay for di cas ainda ta stim’e, cu ainda e ta importante p’e.
