Prome bishita di crusero Symphony of the Seas na Aruba

ORANJESTAD (AAN): Diaranson e barco Symphony of the Seas di Royal Caribbean International a drenta waf di Aruba pa prome biaha. 

Na su entrada el a haya saludo di cañon di awa for di Remolcador di APA.

   Special na e ocasion aki, un delegacion local consistiendo di Aruba Ports Authority (APA), Aruba Tourism Authority (ATA), Directie Scheepvaart, Aduana, y e agencia SEL Maduro & Sons a subi abordo.  Nan a wordo ricibi door di Capitan Angel Oviol y su staf.

   Marc Figaroa di Aruba Ports Authority a haci entrega di un plaquette special na e Capitan pa conmemora e ocasion special aki.

   E barco Symphony of the Seas tabata na Aruba for di 8:00 am te cu 9:00 pm.   E barco cu a construi na Francia y a wordo entrega na 2017, tin capacidad di 5.518 pasahero (doble ocupacion), y e maximo cu e por yega ta 6.680 pasahero.

   E barco aworaki ta riba un viahe di parti Zuid di Caribe, y a sali Diasabra 18 di November di Fort Lauderdale.  Dialuna el a bishita Labadee (Haiti), y Diaranson a bishita Aruba.  Diahuebs e tabata na Curaçao, y Diadomingo e lo tey bek na Fort Lauderdale.