Un deroche di talento presenta durante Art Fair Aruba 2025

San Nicolas ta briyando

ORANJESTAD (AAN) Diabierna anochi e Distrito di San Nicolas a desborda alegria. Mientras na Bario Brazil tabata tumando lugar e Parada di Lanterna, na Centro di San Nicolas, Art Fair Aruba tabata briya.  Tambe na Kulture Café a mira un expo di pintura y artesania, simplemente interesante y maraviyoso. A destaca cu na Aruba e talento di hoben y adulto no tin horizonte. E publico tabata grandi y entusiasma. A hala atencion di mira e presencia di cantidad di mucha y hoben den e evento.

   Den e hanchi tabata tin diferente stand di obranan di man, di tur sorto, yen di colorido, diseño, di forma clasico como super moderno. Pues, un anochi magestuoso, cu a culmina cu dos presentacion di baile di Gang di Arte, den cual e hobennan a demostra pakico nan a gana premio aña pasa, y lo bay representa Aruba na Colombia, muy pronto, despues cu Gang di Arte 2025 tuma lugar.

   Hopi pabien pa tur e talentonan nacional cu a tuma parti den e grandioso Art Fair Aruba 2025 aki. Hopi great pa mira kico nos hendenan hoben y adulto ta produci.