Meverly Romano, PR di DIMP:
ORANJESTAD (AAN)—Departamento di Impuesto a yama un conferencia di prensa Dialuna mainta, cual a cuminza cu un resumen duna pa e Relacionista Publico di DIMP, señora Meverly Romano, tocante e proyecto asina yama MRB, cu ta nifica Impuesto di Vehiculo di Motor.
E resumen ta encera con a cuminza cu e proyecto na December, con e proceso tabata, y con el a sigui cana, durante tur e ultimo lunanan.
Romano a splica cu e modo di e proyecto tabata pa DIMP parti e plachinan di number di e periodo 2025-2029, na un manera structura y eficiente.
“Mirando nos experiencia di pasado, nos no tabata desea p’e publico paga nan number y bin busca nan plachi mesora, pasobra e ora ey bo tin chens di haya di mil pa tres mil persona na bo porta. Nos sa cu e cantidad ta hopi grandi, y pa esaki por a cana structura y mas eficiente posibel, nos a implementa un sistema di cita. E sistema aki a cana tambe cu un proceso cu nos a deliña tambe, aki na Departamento di impuesto, y cu el a encera cu tin e cliente cu ta haci su cita online, nos a uza un sistema digital p’esey, e cliente ta upload su documentonan, y nos tin un team den nos administracion, cu tabata controla e documentonan, y tambe nos tin un team den nos edificio anexo, unda cu e team eynan tabata percura pa saca plachinan tur dia, prepara e pakete di dia, y despues ricibi e clientenan pa nan por parti nan tambe cada dia”, Meverly Romano, PR, a trece dilanti.
El a agrega cu e departamento di Comunicacion di DIMP a coordina tur e citanan por medio di e sistema digital, y si acaso tabata tin kehonan di cliente, nan a atende cu esey tambe.
