Ministro Geoffrey Wever:
ORANJESTAD (AAN): Manera DIARIO a trece dilanti caba siman pasa, e simplificacion di otorgamento di permiso y un loket virtual pa tur peticion di permiso pa negoshi, ta aporta na miho “costumer-service” pa comerciantenan y na e clima empresarial y di inversion di Aruba.
E leynan di otorgamento di permiso pa negoshi ta anticua, e meta di e maneho economico cual mester ta e base di e leynan aki no ta claro y sa di ta di aña 1945 y basa riba e situacion di Curaçao di e tempo ey.
Den proyecto 1 “Aceleracion y mehoracion di proceso di permiso” e permisonan di establecemento di negoshi, permiso di horeca, otorgamento di tereno, permiso di construccion y permiso di estadia y trabao, lo worde revisa y componentenan innecesario lo worde kita. E meta di maneho di cada permiso lo worde formula di nobo y alinea cu e circumstancianan economico actual. Esaki por resulta den cambionan di ley. Criterio pa evaluacion di peticionnan di permiso lo worde explicita y e termino pa decision worde tuma riba peticionnan haci lo worde explicita y acelera.
Minister Geoffrey Wever: “Gobierno mester crea e condicionnan pa facilita comerciantenan haci negoshi y innova”. Una vez proyecto 1 worde finalisa, proyecto 2 “Sistema coherente di permiso tras di un loket virtual” lo cuminsa cu e proposito pa comerciantenan por pidi y haya nan permisonan cu termino claro di decision riba peticionnan haci. E backoffices di e diferente departamentonan cu ta otorga permiso lo worde coordina y lo worde integra unda ta posibel.
Aki Minister Geoffrey Wever a finaliza bisando: “Un cuadro legal nobo y un structura solido pa un economia nobo unda e comerciantenan por tin e confianza y garantia den procedimentonan concreto y transparente”.
