ORANJESTAD (AAN) – De e conferencia di prensa convoca pa Asociacion di Comerciantenan di San Nicolas (SNBA), miembronan di prensa a haya oportunidad di lanza pregunta.
Den e rosea aki, e Secretario di SNBA, Errol de Freitas, a contesta un pregunta basa riba e hecho cu e ciudadanonan, cu ta opone na e desaroyo y via corte a logra para e proyecto di construccion di Secrets Resorts, a basa nan mes riba e structura cu gobierno mes a crea, cu ta stipula den e ley ROP y ROPV, cu tin algun aña caba den vigencia.
De Freitas a señala cu awo tin ROP y ROPV, pero e temponan aya no tabata tin ningun di dos (refiriendo na e desaroyo di horeca pabao di brug). E hotel Secrets ta keda na 20-30 meter for di e beach, pero den e desaroyo di hotelnan di e temponan aya ningun hende tabata protesta; nan tabata contento pasobra tabata biniendo un desaroyo.
“Aworaki nos tin leynan. Aworaki nos tin un grupo chikito cu nos ta respeta pa simple hecho cu nan ta bisa: -Bo sa, nos no ta mucho contento cu esaki”, De freitas a menciona, indicando tambe cu loke e grupo ta contra ta e cantidad di camber cu e proyecto Secrets ta bay tin.
Secretario di SNBA a subraya cu no ta Secrets so lo bin den e area, pero tin diferente otro desaroyo tambe, incluyendo un Boutique Hotel di 40 camber, y tur lo bay yuda lanta e economia di e Distrito San Nicolas.
De Freitas a bisa cu e hendenan cu sa di turismo ta bisa cu no por “play cluster” den esaki, pero mester tin un movimento pa haci e cambio y ta na comunidad pa duna e chens pa haci cambio.
El a remarca cu no ta asina cu SNBA kier pa gobierno haci un excepcion den loke ROPV ta stipula, pa Secrets. Mas ainda, segun De Freitas, e Asociacion aki nunca tabata pro un mega hotel pa San Nicolas, pero actualmente nan ta den e prome fase di construccion y SNBA ta pidi pa “laga e baby cana”.
Nan solamente ta bisa cu San Nicolas mester di e desaroyo. “Nos tin leynan, y e hendenan legislativo di parti di gobierno tin cu bay deal cune, pero nos ta bisando pa no stroba, no pone ni un paro di un desaroyo di e 42% di e poblacion di e pais aki”, De Freitas a remarca.
“Nos tin derecho di biba. Si nos por a haci turismo na Playa, na Palm Beach of na Eagle Beach, kico mas nos por haci pa San Nicolas
