Minister Presidente y FCCA a firma un MoU:
ORANJESTAD(AAN) – Minister Presidente, señor Mike Eman a yama un conferencia di prensa Diamars mainta, y a cuminza bisando cu esaki ta un dia masha importante, hunto cu Directiva di FCCA, representa pa señora Julie Wever, Director Tecnico y Comercial, y señor Giovanni Anthony, Director di Finanzas.
Premier Eman a anuncia cu nan a bin firma un Letter of Intent (MOU), unda cu gobierno di Aruba a haci compromiso cu FCCA, pa locual ta trata e barionan ta doño di nan, ta maneha nan pa nos pueblo, y e tambe ta haci un compromiso cu Gobierno, cu hunto nan ta bay enfoca hopi, durante e periodo nos dilanti, cu ta bay enfoca hopi riba e renovacion y mantencion di e barionan.
“Y den otro acuerdo cu nos a bay firma pronto, tambe construccion di edificio y casnan nobo, pa Aruba, pasobra tin un necesidad hopi grandi di vivienda. Y, nos tin un partner den nos pais, cu pa decadanan caba di tin e capacidad, no solamente di construi cas pa nos pueblo, pero tambe pa maneha nan y esey ta algo cu nos tin cu admira nan y mi tin cu duna palabra di elogio, na FCCA”, e dignatario a señala.
El a agrega cu semper tin reto den e mantencion, di con ta calcula e huur, y ta tende personanan cu tambe tin pensamentonan critico riba esey, pero esey ta ora tin hopi responsabilidad, locual FCCA tin.
“Specialmente, cu un parti di nos comunidad cu tin e hopi, hopi dificil”, prome minister a subraya.
“Y pa motibo di esey, awe nos ta cuminza enfocando riba e comunidad cu tin e mas dificil cu ta e barionan cu tin hopi cas di pueblo, y nos ta mira cu tin necesidad pa e barionan ey haya atencion special, unda ta bay enfoca riba mantencion, pa cuminza e limpieza, den e barionan ey. FCCA a entrega mi un rapport ayera, unda evidencia ta mustra cu tin un trabao di un responsabilidad di gobierno, tambe pa percura pa e limpieza”, Minister Presidente a bisa.
E dignatario a indica cu e ta bayendo pa wak cu si mesun wowo, hunto cu Serlimar, DOW, City Inspector, den e casnan di Pueblo na Noord, na Monserat, pa cuminza cu loke FCCA ta pidi gobierno pa haci tambe y cu tur razon pasobra gobierno tambe tin cu asumi su respnsabilidad, den mantencion di e barionan.
“Y, como muestra cu esaki no ta algo cu solamente nos ta tene na palabra, pero realmente nos ta bay cumpli cu ne, nos ta bay firma e MoU aki, gobierno ta asumi su responsabilidad y FCCA di su banda, ta bay traha hunto cu Gobierno, pa nos mehora e calidad di bida den e barionan”, Minister Presidente Mike Eman a bisa.
