Diego Acevedo:
ORANJESTAD (AAN) Diego Acevedo, Project Manager di SISSTEM, na Universidad di Aruba, den entrevista cu DIARIO a elabora tocante e “International Conference of Marine Science” (ICMS) 2025, cu lo tuma lugar e dianan 26 y 28 di Mei proximo na UA mes.
Diego Acevedo a splica cu esaki ta un conferencia internacional cu ta tuma lugar cada dos aña. E ultimo dos conferencianan a tuma luga na Colombia, y e ta un iniciativa di Center Excellence Marine Institute. E conferencia tin representacion di Institutonan internacional di Alemania y Colombia, cu ta bin hunto, pa cuminza wak con Aruba por trece hunto expertonan den e ramo di ciencia, cu por yuda cu e solucionnan necesario pa e isla.
“Esey ta algo cu ta keda hopi importante pa Aruba, nos tin hopi lama rond di nos, y nos ta mira cu esaki ta un area valioso pa trece un conferencia asina na Aruba, unda ta bin expertonan di tur ramo cu tin di haber cu lama, eigenlijk tur sorto di hende cu ta trahando cu lama, y nan ta bin hunto pa mira e solucionnan y retonan cu nos tin den lama y rond mundo”, Acevedo a señala.
Acevedo a indica cu Universidad di Aruba ta Anfitrion di ICMS 2025, y e ta wordo haci cu enfoke mundial di Isla. “Nos tin expertonan di full rond mundo cu ta biniendo y nos tin registro di mas di 50 experto mundial cu lo bin Aruba; di Japon, Madagascar, Alemania, Francia, Colombia, Merca, cu lo bin papia di Marine Science y cu nos por bay dilanti”, Diego Acevedo a subraya.
El a expresa cu UA ta haciendo esaki cu hopi ilusion, pa trece un conferencia asina importante den nos region. “Anto e ta uni nos no unicamente cu Europa, cu Merca cu semper ta uni, pero tambe cu America Latina”, Diego Acevedo a señala.
El a agrega cu hopi di e participantenan ta bin di Colombia, y nan ta traha den otro islanan Colombiano, pero tambe den San Andres cu ta algo mas similar na Aruba su condicionnan.
