Minister Geoffrey Wever:
ORANJESTAD (AAN): Minister di Finansa, Asunto Economico y Sector Primario, Geoffrey Wever, ta representa Aruba na e evento regional di Dutch Caribbean Agriculture, Livestock and Fisheries Alliance (DCALFA), unda ta trata e tema crucial: “Policy Vision for Food Security in the Dutch Caribbean.”
Na e conferencia, Aruba ta presenta su vision pa un sector agricola resistente, innovativo y inclusivo — un base solido pa seguridad alimenticio y diversificacion economico a largo plaso. A traves di entidadnan manera Santa Rosa, Aruba Agriculture Development Company (AADC) y e desaroyo di Agri Innovation Park, Aruba ta trahando pa crea un sistema di produccion alimenticio cu ta sostenibel y adapta specialmente pa nos isla chikito cu tin su propio clima, reto y potencial.
Pilarnan principal den vision agricola di Aruba:
- Liderazgo y coordinacion: Santa Rosa y AADC ta hiba e cambio agricola, trahando nman den man cu sector priva pa logra proyectonan importante.
- Agri-Innovation Park: Un zona nobo pa agricultura moderno y sostenibel. Aki agricultornan por haya tereno, infrastructura y yudansa pa cuminsa of amplia su produccion.
- Centro di enseñanza y innovacion: Den e Park lo tin un Centro di Excelencia pa training, demostracion di tecnologia y investigacion (research) agricola.
- Apoyo pa agricultornan nobo: Cu programa manera Agri-Loan y Agri-Business Academy, agricultornan por haya prestamo cu interes abou y capacitacion pa su negoshi.
- Certificacion di calidad: Aruba mester introduci un sistema di certificacion pa producto local, pa garantiza cu e producto ta sigur pa come segun standard.
- Educacion den scol: Programa pa mucha pa siña riba naturaleza y agricultura, pa forma un generacion mas consciente y interesa den agricultura moderno y sostenibilidad.
- Proteina local: Aruba mester yuda criadornan di galina y pesca pa mehora produccion local di proteina, cu respet pa nos piscadornan tradicional.
Minister Wever ta enfatisa e necesidad pa harmonisa leynan agricola entre islanan Hulandes-Caribense, pa facilita inversion, intercambio comercial y garantisa seguridad alimenticio. Aruba ta trahando pa modernisa su marco legal y ta invita e otro islanan pa desaroya un strategia comun.
“Seguridad alimenticio no por wordo logra nos so. Ta un desafio regional, y Aruba ta dispuesto pa asumi liderazgo den colaboracion strategico,” Minister Wever a declara.
DCALFA ta sirbi como un plataforma vital pa reforza cooperacion, intercambia conocemento y fortalece e resiliencia di nos islanan den Reino Hulandes. Aruba ta cla pa sigui contribui activamente den esfuersonan regional pa un futuro mas sostenibel y sigur.
