Bunita recepcion na ocacion Dia Nacional di Aruba na Hulanda
ORANJESTAD (AAN)/Den Haag –Minister Plenipotenciario mr. Ady Thijsen y esposa a tene un recepcion pa celebra Dia di Himno y Bandera na Hulanda.
Desde 2015 Arubahuis ta tene un recepcion pa invitadonan for di e mundo politico, embahadornan, funcionarionan halto di Estado of di ministerionan cu lasonan estrecho cu Aruba. Tambe entre e invitadonan tin miembronan prominente for di e comunidad Arubiano na Hulanda y representantenan commercial y di institutonan di enseñansa tanto riba nivel di HBO como Universidad.
Entre e huespednan tabata Secretario di Estado pa Asuntonan di Reino Alexandra van Huffelen, presidente di Eerste Kamer Jan Bruin, miembro di Tweede Kamer pa VVD Roelien Kamminga, burgemeester di Den Haag Jan van Zanen, burgemeester di Venray Leontien Kompier y ex minister di Husticia y vice-presidente di Raad van State Piet Hein Donner. For di e cuerpo diplomatico tabata presente entre otro embahadornan di Merca, Brazil, Kazachstan, Alemania, Japon, Uruguay, Cuba, Suiza, Surnam, Panama, Rumania y representante di embahada di Mexico, India, Norwega, Canada, Colombia y Italia.
E programa oficial a cuminsa cu canto di nos himno Aruba Dushi Tera pa e soprano Arubiano Imara Thomas, acompaña pa e banda di Raffi Camacho. Minister Plenipotenciario mr. Ady Thijsen a cuminsa na bisa cu e localidad di hotel Babylon ta historico, pasobra akinan e delegacion di Aruba den añanan setenta tabata hospeda durante e negociacionnan cu Hulanda pa e lucha pa Status Aparte. ‘Loke a logra tambe y Aruba desde prome di januari 1986 a bira un pais autonomo den Reino Hulandes. Nos himno y bandera ta simbolonan di unidad, identidad y libertad di nos pueblo. Ta danki na esfuerzo di nos gran lider sr. Betico Croes dfm y ex Prome Minister sr. Nelson Oduber cu ariba 18 di maart 1976 pa prome biaha a hisa e bandera di Aruba y Aruba Dushi Tera a keda aclama como nos himno nacional,’ asina minister Thijsen a bisa.
E mandatario a remarca cu Aruba ta un pais cu un derecho di estado, pero chikito. Esaki ta haci Aruba un pais hopi vulnerabel pa desaroyonan di afor, manera economia mundial y disaster di naturalesa. Sr. Thijsen a bisa cu ta esencial pa Aruba tin bon gobernacion, seguridad legal y proteccion di derechonan humano.
‘Aruba a haya un sla duro door di pandemia di Covid, pero ta recuperando hopi bon y ta mustrando pa e aña aki un crecemento economico cu ta na nivel di pre pandemia. Afortunadamente e pilar economico mas importante di Aruba cu ta turismo ta bayendo hopi bon. Mas diversificacion di economia di Aruba por wordo spera e aña aki den e sector di energia. Minister di Energia a establece un vision nacional pa cu energia cu por conta riba diferente “stakeholders”, particularmente the Hydrogen Valley Project. Basa riba esaki Aruba por cumpli cu e tratado di Paris. Den luna di mei e aña aki – Aruba y Hulanda – lo organisa un conferencia di Reino riba Clima y Energia na Aruba. Minister di Hulanda pa Energia y Clima Rob Jetten lo atende e conferencia aki,’ segun minister Thijsen.
‘Tambe minister di Economia di Aruba ta trahando duro pa mehora e clima pa inversionistanan y desaroyonan sostenibel den cual e metanan di the Sustainable Development Goals (SDG’s) den un pais SIDS ta hunga un rol importante. Hunto cu otro partnernan di Reino y di Union Europeo, trabaonan ta wordo haci pa innovacion y digitalisacion di enseñansa na Aruba. Tin hopi trabao ainda pa haci, pero nos ta optimista. Arubianonan ta fuerte y elastico. Nos a prueba esey. Nos lo bons bek y bons dilanti. Pero semper nos ta keda realistico,’ asina minister Thijsen a bisa.
Sr. Thijsen a mustra den su discurso riba diferencia di opinion den Reino, manera e pasado di esclavo, e deficit democratico y e “geschillenregeling”. Na mesun momento segun e mandatario ta existi interes comun cu tin efecto pa tur hende den Reino. Thijsen: ‘Mi ta kere den un Reino fuerte cu respet pa otro, igualdad, husticia y unidad. E aña aki lo ta crucial den cuadro di decisionnan cu mester wordo tuma.
Mi tin pleno confiansa den nos Prome Minister mr. Evelyn Wever-Croes y Secretario di Estado pa Asuntonan di Reino drs. Alexandra van Huffelen. Arubahuis lo hunga un rol importante den esaki. Nos vision pa fortalese nos relacion den Reino y pafor di Reino ta basa cu nos ta kere den conecta y ta pesey nos a bishita diferente municipio, provincia unda nos a hiba combersacionnan bon y constructivo, en especial cu e burgemeester di Den Haag Jan van Zanen cu alabes ta presidente di VNG y burgemeester di Venray Leontien Kompier.
Nos a bishita diferente scol HBO y Universidad. Ademas nos a bishita y papia cu diferente embahada na Den Haag. Semper nos por traha hunto riba tur tereno cu e meta pa sostene otro y logra un mihor futuro pa nos pueblo y pais,’ asina Minister Plenipotenciario Ady Thijsen a termina su discurso.
Arubahuis tin comprension cu banda di e recepcion aki, no tabata tin un celebracion di Arubadag pa e publico general. Un comision na Aruba conhuntamente cu Arubahuis a bin ta evaluando e concepto di e celebracion di Arubadag na Hulanda. Esaki como meta principal cu e evento mester por bira sostenibel financieramente, lo mester por refleha e sentimento di e Arubiano bibando na Hulanda y alabes lo mester profila Pais Aruba na diferente instancia Hulandes riba varios terenonan, manera laboral, inversion, economia, cultura y turismo. Un proceso cu ta exigi hopi tempo. Mirando cu e proceso ey ainda ta den e fase pa yega na un decision concreto den cual forma Arubadag lo bay wordo teni na Hulanda a haci cu e no ta factibel pa organisa un Arubadag den luna di maart, manera semper tabata e caso pa un publico general.
Potretnan ta cortesia di Arubahuis. Fotografo: Nico van der Ven
