Un buki pa tur mucha na Aruba  

ORANJESTAD (AAN):  Liliana Erasmus a skirbi un buki pa tur mucha na Aruba. Y Danielle Schothorst a ilustra esaki masha bunita mes.

Un buki unico, dibertido y yen di aventura na biblioteca. Escritora di buki pa mucha, Liliana Erasmus, un bes mas ta surpasa tur expectativa cu ‘Aza y e portanan magico’. Un buki pa tur mucha na Aruba pasobra e ta skirbi na Papiamento y Hulandes. Biblioteca Nacional Aruba ta presenta e buki aki cu orguyo y alegria.

            “Pa Aza, lesa no ta un fiesta. Semper e tin cu comporta su mes nechi den biblioteca. Buki cu prenchi ta bay ainda, pero buki cu hopi texto…brrr. Awe Aza ta hunga cac’i sconde cu su amigonan. Gewoon den biblioteca mes! E ta sconde den Verteltoren. Pero den esey e ta ripara cu su amigonan a somenta. Ta bon mes cu e ta haya un buki cu e conoce bon: ‘Barba brabo y e Portanan magico!’ Ora Aza kier dal e buki sera, e buki ta bin na bida.”

            ‘Aza y e portanan magico’ ta un produccion den cuadro di e Festival di buki pa mucha’, edicion 2024 y a keda publica pa Levendig Uitgever. Scolnan participante ta ricibi e buki como regalo. Tur cliente di libreria ta haya e buki aki gratis cu compra di 25 florin, tanten cu tin. Por haya e buki gratuitamente na tur libreria ora cumpra un buki pa mucha, tanten cu tin. ISBN 9789083392950.

Biblioteca ta organisa e Festival di Buki pa Mucha pa stimula tur mucha na Aruba pa lesa. Y biblioteca ta invita tur mucha na Aruba pa bira miembro y asina lesa hopi mas buki. Pa stimula lesamento poco mas, miembrecia pa mucha y hoben ta completamente gratis.

            Biblioteca Nacional Aruba ta publica e buki cu sosten financiero di Kiwanis Club of Palm Beach, Quota International of Aruba, Amsterdam Manor Resort, De Wit & van Dorp, Plaza Bookshop, Kooyman, Total Finance, Sra. Jimenez, Plus Accountants, AIB bank y SETAR N.V.

            Liliana Erasmus (’74) tin un pasion grandi pa skirbimento. E ta, entre otro, escritora di buki pa mucha y contado di storia y uno hopi creativo. Biblioteca tin tur Liliana su bukinan pa e lesadornan chikito. Liliana ta activo riba tereno di promocion di lesamento bou mucha. Danielle Schothorst a studia arte visual y ta skirbi y ilustra buki pa mucha. Danielle ta bin Aruba pa e Festival di Buki pa Mucha pa hunto cu Liliana presenta e buki nobo.