Un bista nobo cu muraya yamativo na Dump di Parkietenbos

ORANJESTAD (AAN): Manera ta conoci, porfin a logra cu e “candela” riba Dump na Parkietenbos a stop completamente. 

Full e tereno a wordo procesa segun un maneho integral cu a cambia e forma cu ta atende desperdicio (sushi), esta haci uso di principionan di ‘Reduction, Recycle, and Reuse’ (RRR).

   Despues di hopi decada, e forma cu Dump di Parkietenbos di opera a cambia.  Heronan bieu y demas sushi ta wordo manda otro lugar.  Y e momento a yega pa asina crea un bista mas bunita pa e area di e Dump, a lo largo di e caminda bieu di Playa pa San Nicolas.

   Y aki por mira caba con un muraya grandi a wordo lanta dilanti Dump, cu ta haya su forma decorativo riba e muraya, y cada pilar ta wordo crea cu un concepto di decor di glas bastante yamativo.

   Ainda e trabao ta andando, pero e ta simbolizando un fin na e “bista mahos” y “holor teribel” cu habitantenan di Parkietenbos, Simeon Antonio, Bucutiweg y Cas Paloma a biba aden pa hopi decada.  No ta conoci pa ki tempo e cura aki lo keda cla.