Minister Cicilia:
*Meta ta pa crea un solucion acelera y eficiente pa yena e vacaturanan urgente
ORANJESTAD (AAN): Diamars mainta, den un esfuerso pa trece claridad y trankilidad den un momento crucial pa nos economia, Minister di Labor, mr. Wendrick Cicilia, a ricibi algun pregunta di prensa pa duna splicacion di e maneho adapta temporalmente pa e proceso di aplicacion pa permiso laboral.
Ta conoci cu ya pa algun luna tin un demanda alarmante pa forsa laboral den e sectornan manera hospitalidad y comercio. Varios gremio comercial a expresa nan preocupacion, señalando cu nan no ta logra yena e vacaturanan, locual ta pone un peso enorme riba e personal existente.
E situacion aki ta forsa e empleadonan pa traha overtime regularmente causando cansancio extremo y eventualmente reduci e calidad di servicio, cual na su turno ta afecta e operacion di e empresa mes. “E continuidad di e empresa ta na peliger, y na momento cu bo no tin suficiente trahado, bo no por cumpli cu e demanda”, segun Minister Cicilia.
Reforma temporal pa acelera permiso laboral
Pa yuda alivia e situacion aki, dia 24 di april 2025, Minister di Labor mr. Wendrick Cicilia, hunto cu Minister di Husticia y Integracion mr. drs. Arthur Dowers, a implementa un cambio temporal den e proceso di aplicacion pa permiso di trabao. Esaki ta encera e suspencion temporal di e “arbeidsmarkt toets” individual cu tradicionalmente DPL ta haci prome cu DIMAS por trata un peticion.
E ahuste aki ta un reaccion necesario pa acelera e tramite di permiso laboral, mirando cu e arbeidsmarkttoets individual ta crea un ‘bottleneck’ den un periodo caminda e demanda ta supera e oferta riba e mercado laboral.
Un proceso di consulta amplio cu sector priva
Durante e periodo di formacion, a tuma tempo pa dialoga cu instancianan clave den nos comunidad, manera AHATA, ATIA, CUA, AF&BA y otro entidadnan. E mensahe for di e sector priva tabata cla: e falta di trahado ta un problema structural pa crecemento economico di Aruba.
“Na 2007 a introduci e abreidsmarkt toets cu e meta pa proteha nos mercado laboral local y tabatin suficiente persona riba e mercado laboral disponibel”, Minister di Labor a expresa. No obstante, e realidad actual ta exigi flexibilidad y cambio. Cu e cantidad di hotel nobo cu recien a habri y anticipando mas cu lo ta habriendo pronto, e presion riba e mercado laboral ta sigui crece.
Garantia pa empleadonan y mantenecion di stabilidad
Minister Cicilia, den un dialogo recien cu DPL, SEPPA, TOPA y representantenan sindical, a garantisa cu e cambio aki ta temporal y lo evalua e mercado laboral continuamente y adapta e maneho segun necesidad. “Nos por compronde cu esaki por causa cierto preocupacion, pero esaki ta un necesidad a corto plaso pa por atende cu e reto laboral aki”, Minister Cicilia a enfatisa. E empleadonan di DPL no tin motibo pa preocupacion, nan futuro laboral ta garantisa.
E meta ta pa crea un solucion acelera y eficiente pa yena e vacaturanan urgente, sin afecta e stabilidad di e personal cu ta traha incansablemente na desaroyo di nos Pais.
