Un biaha mas MetaCorp a tene su “Ham Event” tradicional pa tur empleado

ORANJESTAD (AAN): “E no tabata nos miho aña. Pero nos no a para nos inversionnan. Al contrario, nos a opta pa probecha di e momento pa haci mas inversion y asina prepara nos mes pa ora cu e pandemia pasa y nos drenta e epoca di recuperacion”,

asina Eddie de Veer, director di MetaCorp a bisa durante nan evento tradicional “ham event”. Manera ta costumber, e directornan di MetaCorp mes ta grill hotdog pa tur empleado.

   “E aña ta cera lagando atras inversionnan grandi den The Movies na Gloria riba Sasakiweg, na EcoGas na Barcadera, na e planta di cement na ATCO Concrete Products, den e planta di produccion na Brouwerij Nacional Balashi y asina mi lo por sigui menciona”, segun Eddie de Veer. Esey ta haci cu den e aña nobo, tur e companianan ta cla pa por ofrece mas y miho servicio y cu un variedad mas amplio di producto na nan clientenan.

   “Nos no a solamente percura pa mas inversion, sino nos a percura pa cupo di trabao adicional tambe. Cu esey nos ta spera di a duna nos aporta na inyecta nos economia na momento cu mas tabatin mester di dje y asina no solamente conserva cupo di trabao, sino crea mas cupo tambe”.

   Pa loke ta e evento mes, tur empleado di tur e companianan cu ta resorta bou di MetaCorp, ta haya un ham di Pasco regalo. Tambe ta haya treat special durante e evento, cu a inclui e Balashi Beerwagon presente. Empleadonan di tur e companianan a haya bon chens pa topa cu otro y pa por socialisa, aunke teniendo cuenta cu reglanan di DVG.

   Gerencia di MetaCorp ta masha orguyoso di tur empleado pasobra aunque e aña tabata dificil, toch a explora delaster un oportunidad pa capitalisa riba dje, revisa forma di traha pa ta mas eficiente, yuda baha gastonan operacional y di enfoca pa gana mas mercado.Y den esey empleadonan a hinca schouder bou di e retonan. “Nos a haya oportunidadnan nobo y nos a haci miho di tur expectativa e aña aki”, asina Eddie de Veer a bisa cu un sonrisa di satisfaccion riba su cara.

   MetaCorp, bou direccion di Peter, Guus y Eddie, a yama e empleadonan danki di curason p’e esfuerso, energia, dedicacion y lealtad cu nan a demostra durante e aña. Obviamente durante e temporada di Pasco ta desea nan hopi salud, sabiduria y cu nan pasa cu nan famia na un forma hopi responsabel y cla p’e oportunidadnan cu 2022 lo trece cu ne pa e compania y pa Aruba completo!