ORANJESTAD (AAN): Riba Diaranson por a nota un biaha mas candela riba Dump na Parkietenbos. Esaki tin biaha ta dura oranan largo prome cu decision cay pa djis bay paga e candela.
Kende ta cende e candela? Tin biaha ta quimiconan bao tera mes ta forma un reaccion cu kizas awa (di awacero), y esaki ta genera suficiente cayente pa asina cuminza kima obhetonan den vecindario. Esey ta un teoria di algo cu ta pasa na hopi dump rond mundo. Aunke no por descarta e posibilidad, manera a socede cu den pasado a yega di gara hende cu intencionalmente ta kima sushi na Parkietenbos.
Recien un persona a sugeri pa mescos cu Refineria di Lago tabatin su mesun Unidad di Fire Department, kizas Dump di Parkietenbos mester crea su mesun Bombero cu su instalacionnan di tubonan di awa, pa mesora nan por rek slang y basha awa pa purba paga esaki.
Aunke tin biaha, un candela di quimico no ta paga facilmente cu awa, y mas bien ta pone esey bira mas agresivo y ta plama mucho mas. E ora ta foam of otro producto tin di usa pa paga candela.
