Parlamentario Marco Berlis (MEP) ta papia di The Wallstreet Journal:
ORANJESTAD (AAN): The Wallstreet Journal, un di e fuentenan di media mas grandi y renombra na Merca, a publica un articulo importante recientemente tocante Gas natural y LNG Gas. Den e articulo aki e Chief of US Energy Regulator a duna “Climate Endorsement” na Gas Natural. E chairman di e Federal Energy Regulatory Commission (FERC) a bira e siguiente federal oficial pa aproba y para tras di Gas Natural como un beneficio potencial pa combati y aporta na e situacion climatico mundial.
Ademas ta conoci cu awor e administracion di president Joe Biden ta luchando pa exporta mas Gas Natural pa e aliadonan na Europa. Esaki sigur pa via di e guera na mannan di Rusia contra Ukraine, mientras mayoria di e paisnan Europeo ta completamente dependiente riba Rusia pa nan necesidad di Gas Natural. Esaki ta posiciona Europa den un lugar hopi debil y vulnerabel. Cambiando nan fuente di Gas for di Rusia pa Merca lo fortalece nan posicion y lo sigura cu nan industria y ciudadania por conta cu un operacion sin interupcion. Esaki lo kita influencia y forsa di Rusia contra e aliadonan, pasobra Rusia no lo por castiga nan dor di corta e suministro di Gas Natural for di nan.
E articulo ta sigui bisa cu den diferente biaha na CERAweek cu a wordo organisa pa S&P Global Energy Conference e siman cu a pasa na Houston, oficialnan di Washington a bisa cu Gas Natural tin un lugar den mix den e futuro di energia. Esaki a cuminsa caba ora cu Presidente Consehero di Clima sr. John Kerry a “endorse” Gas Natural como un export importante pa e mundo desaroya. E chaimain di e comision di FERC sr. Richard Glick, un democrata, a bisa e siman ey di e declaracion di sr. John Kerry y mi ta quote; “Mester husga tur caso basa riba nan situacion realistico, y mayoria di biaha nan lo demostra di ta un beneficio pa reduci emisionnan.”
FERC tambe ta trahando pa acelera e procesonan pa companianan haya permiso pa pipanan y terminalnan di exportacion di Gas Natural. Adicionalmente FERC ta trahando hunto cu e Departamento di Energia pa yuda Europa, incluyendo e esfuerso pa acelera e construccion di mas tubonan di Gas cu lo mester yuda pa mas capacidad di Gas Natural por wordo exporta. Sr. Glick ademas a asegura cu nan ta haciendo esaki no solamente pa e construccion di e tubonan di Gas Natural pero tambe pa LNG Gas!
Manera pueblo por wak, mundo henter ta declara Gas Natural e alternativa pa awor pa nos clima y medio ambiente. Tambe como un fuente pa un combustibel pa futuro y cu Merca lo haci todo por todo pa esaki bai di un forma eficiente y cu por ta sigur cu esaki ta conta cu e apoyo di e Presidencia y gobierno di Merca completo. LNG Gas y Gas Natural ta e siguiente paso logico, limpi, economico y efectivo pa nos compania nacional WEB Aruba NV usa!
Di e forma aki como pais nos ta sigui e trend di normanan mundial y alaves ta dal un stap grandi pa cuida nos medio ambiente cu ta asina importante pa nos pais. E ta tempo pa elimina na gran escala e uso di HFO for di WEB Aruba NV y transiciona den un fuel cu lo haci nos e di dos pais den Reino cu lo opera riba Gas Natural. Esaki sigur ta un logro enorme pa nos pais cu a bin ta un trendsetter pa hopi otro pais den e region y cu no tin miedo di inverti den nos futuro!
