ORANJESTAD (AAN): Den fin di siman cu a pasa, a celebra un momento special, esta e di 50 aña di existencia di Departamento di Agricultura, Cria y Pesca, Santa Rosa.
Den cuadro di e aniversario di oro aki, Minister di Finansa, Asunto Economico y Sector Primario, Geoffrey Wever, a participa na un almuerzo special organisa pa e empleadonan di Santa Rosa, pa celebra hunto e logro importante aki.
E 50 aña di Santa Rosa ta representa 50 aña di historia, conocemento, dedicacion y compromiso cu desaroyo di agricultura, cria y pesca na Aruba. Tras di e cinco decadanan aki tin generacionnan di empleadonan cu nan trabou y perseverancia a contribui na desaroyo di nos sector primario.
Pa Minister Wever, e aniversario aki no ta solamente un momento pa reflexiona riba loke a wordo logra, sino tambe pa reafirma su compromiso cu futuro di sector primario. Un futuro den cual innovacion, inversion, sostenibilidad y mas oportunidad pa nos agricultornan, criadornan y piscadornan ta ocupa un luga central.
Santa Rosa tin un papel fundamental den e vision aki. Fortaleciendo e departamento y trahando hunto cu nos productornan local, nos kier crea un sector primario mas fuerte, mas moderno y cu mas capacidad pa contribui na seguridad alimentario y diversificacion economico di Aruba.
Ministro a manda un felicitacion special na tur empleado, tanto actual como di pasado, cu durante e ultimo 50 aña a contribui na e historia di Santa Rosa. Boso dedicacion y compromiso merece nos reconocemento y aprecio. Nos ta honra 50 aña di historia, mientras nos ta sigui construi futuro di sector primario di Aruba.
Pabien Santa Rosa cu boso 50 aniversario!
