Hende agota den menasa guera nuclear y mundo desorienta
*Cervez pa 15 Dollar na Oktoberfest y petroleo cu prijs cu por subi
*Comunismo ta bira desesperacion y Merca den eleccion Midterm
ORANJESTAD(AAN)- E ultimo siman di September a bati na porta. Proximo fin di siman lo marca entrada di e ultimo trimester di 2022.
Hopi acontecimento mundial ta uni cu otro na un planeta, cu Presidente di Nacionnan Uni a yama un mundo desfuncional.
Cu mundo a bira desfuncional, a bini dilanti den e comportacion humano rond mundo, dependiente di loke ta pasa na cada pais.
Central ta e dolor di hende. E falta di seguridad pa un futuro cu no ta brinda hende e siguransa cu un ser humano mester como ser humano cu e ta, pa sigui cana den situacionnan dificil y hasta desconoci durante hopi tempo.
Hopi pais a copia e celebracion di Oktoberfest, un festival di cervez cu tin su origen na Bavaria.
E ta duna prueba di e hecho cu hende ta busca tur ocasion cu e por pa lubida e realidad actual.
Na paisnan cu religionnan exigente, problemanan serio a surgi ora cervez a bira e centro di atencion den celebracionnan, cu na Munchen a bira e forma pa Europa sigura su mes kico inflacion ta nifica pa e pais y pa Euro, cu a sigui cay ayera.
Un cervez tabata costa ayera na Munchen 15 Dollar pa un glas grandi. Asina mes e multitud ta gasta hopi na cervez den e festival cu Covid-19 a paralisa y atrobe a wordo celebra di 17 di September pa 3 di October.
Alegria no tabata existi e dianan aki na hopi pais. Na Rusia comunismo a expresa su cara di desesperacion cu soldatnan cu ta nenga di bay forma parti di ehercito di Putin, cu ta exigi hobennan bay entrega nan bida den e guera di Ukraine.
E resultado di guera te awor, no tabata manera Putin a spera y sigur no ayera ora un Diputado cu ta na fabor di Rusia na Ukraine a topa cu morto den un atake di Ukraine contra e edificio den cual e tabata.
Mundo atrobe ta wordo presenta cu e menasa di un bom atomico di parti di un Putin desespera, cu na Rusia mes ta topa cu mas y mas oposicion.
Loke ta pasa na Rusia sin duda tin impacto na Merca cu tin su propio asuntonan politico pa atende.
Na inicio di November 2022, Merca lo tene su asina yama Midterm elections, den cual generalmente e sosten na e actual gobernacion di e pais tambe mester bini dilanti.
Te na e momentonan aki, sinembargo, no tin ningun indicacion fuerte kende lo ta e cantidato preferi di Democrats pa sigui Biden ni pa representa Republicanonan na 2024.
Manera anteriormente DIARIO a splica, dia 8 di November 2022 Merca lo eligi 435 miembro di Cas di Representantenan (House of Representatives) y 35 di e 100 miembronan di Senado.
House of Representatives y Senate ta forma e Congreso Mericano.
Mundo politico na Merca, mescos cu na hopi pais na mundo, ta den un situacion dificil encircula pa cantidad di problema.
Hende a cuminsa cansa rond mundo cu problema y mas problema.
A pensa cu den e futuro directo lo no scucha mas di petroleo, cu un prijs cu a baha considerablemente.
Expertonan, sinembargo, ta indica cu e prijs por bolbe subi pa e simpel motibo cu e reservanan cu a wordo uza pa evita na cumpra petroleo na un prijs halto, a cuminsa baha. Esaki ta nifica cu uzo di petroleo atrobe lo no depende di loke tin reserva pero di produccion.
Tres luna mas y 2023 lo bati na porta. Manera nos a pronostica for di hopi dia pasa, e chens ta grandi cu na 2023 inflacion lo pusha mundo den un recesion, cu lo tin impacto enorme na un mundo di confusion cu sin duda ta bira tambe e mundo di cambionan grandi cu por spera.
Un resumen di tur loke a pasa siman pasa ora Nacionnan a Uni pa na un forma critico atende cu hasta nan problema pa existi como union, ta duna prueba cu mundo ta den un consternacion grandi y cu 2023 mester bira aña di reforma mundial .
Liderazgo lo ta e exigencia di 2023, manera resumennan cu DIARIO lo sigui presenta, lo demostra.
