Hopi hende a bay probecha di e Mercado Santa Rosa

ORANJESTAD (AAN): Principalmente hendenan cu ta cobra salario trempan via Gobierno, a probecha di e Mercado Santa Rosa teni Diadomingo mainta pa merdia. 

Esey ta debi cu sector priva mes lo cobra nan salario te cu e siman aki, pues nan no a haya chens di bay probecha di e Mercado Santa Rosa.

   Mercado Santa Rosa tabata di 8’or di mainta te cu 1’or di merdia. Un biaha mas, tabatin productonan fresco local na excelente prijs.  Tabatin fruta y berdura, como tambe demas productonan manera Pica, Jam, Cos dushi, Productonan natural, etc.

   Manera ta conoci, debi na Pandemia di Covid-19, durante dos aña no por a organiza e mercado Santa Rosa, pero aworaki nan tey bek cune.  Nan a pone e biaha aki den un area unda tin mas fresco.

   Como 40 participante di diferente productor tabatin nan productonan na benta, incluyendo cuminda crioyo, pisca y carni fresco, y tambe mata.