Ultimate Automobiles a habri nan showroom special pa autonan Chery

E marca di China cu ta ganando hopi premio

ORANJESTAD (AAN): Un cantidad di invitado, cliente, y personanan di mundo bancario tabata presente Diasabra atardi pa anochi, pa asina ta testigo di e fenomenal re-apertura di un showroom nobo di auto na Aruba.

   ‘Chery’ ta un marca di auto di China, cu recientemente a uni e famia di Ultimate Automobiles, conhuntamente cu Suzuki y BYD.

   Na nan sede na Sabana Blanco 35, a tuma lugar e inauguracion di e showroom cu ta bay bira e cas oficial di Chery na Aruba.

   Gerencia di Ultimate Automobiles tabatin un anochi special prepara, unda nan a ricibi tur invitado cu man habri, sigui pa presentacion di historia di e marca.  Nan team di benta tabata cla pa duna tur hende un splicacion di interior y exterior di cada Chery eynan.  Algun persona a hasta bay haci test-drive di modelonan di Chery.  Tambe tabatin musica pa entretene tur hende.

   Showroom: E anochi a consolida e rol di Ultimate Automobiles como e “proveedor principal di vehiculonan di tecnologia halto certifica di fabrica y adapta na e estilo di bida di Aruba.

   Mientras cu automobilistanan di Aruba cada biaha ta busca un balansa entre tecnologia sofistica, eficiencia den consumo di combustibel y siguridad riguroso, e yegada di Chery ta ofrece un alternativa solido y respaldo direct di e fabricante compara cu autonan di segundo mano y esnan importa di mercado shinishi.  Diseña pa satisface e exigencianan unico riba camindanan di Caribe, Chery ta combina diseñonan ganador di premio cu durabilidad na nivel mundial.

   “E yegada di Chery na Aruba ta reforza nos compromiso di ofrece solucionnan di mobilidad di calidad halto, respalda pa e fabrica,” ta loke Sudesh Manichand a bisa, kende ta director general di Jolley Holding Group.  “Como e exportador principal di autonan di China pa 23 aña, Chery ta trece un nivel di inovacion y sosten di servicio integral sin igual riba nos mercado.”

   Sosten pa comunidad y duna bek na sociedad: Hopi prome cu e showroom a habri, ya caba Chery a cuminza mustra su compromiso cu comunidad di Aruba via di nan participacion activo den esfuerzonan caritativo riba e isla.  Reconociendo e importancia di deporte y filantropia, Chery ta orguyoso di ta un di e patrocinadornan principal di e recien teni A. Nieuwmeye Annual Charity Golf Tournament organiza pa Divi Impact.  Door di sostene e iniciativanan aki, Chery y Ultimate Automobiles ta defende e espirito di ‘duna bek na comunidad’ sigurando nan mes cu e presencia di e marca ta contribui na forma significante na bienestar di comunidad local y causanan social.

   “Na Ultimate Automobiles, nos ta kere fuerte pa sostene iniciativanan cu ta haci Aruba mas fuerte,” ta loke Gershom Oduber a bisa, kende ta gerente general di Ultimate Automobiles Aruba.  “Sea cu e ta via di nos apoyo di instancianan caritativo local of doro di duna e isla transporte sostenibel y confiabel, nos ta comprometi pa pusha pa un cambio positivo.  Nos ta hopi contento di ofrece Chery, un marca cu ta comparti nos pasion pa excelencia y servicio na comunidad.”

   Aspectonan grandi di Chery:  Aki ta sigui algun aspecto grandi y argumentonan clave di e marca Chery.

(*) Lider mundial den exportacion:  Nan ta reconoci como e exportador principal di auto di China pa 23 aña consecutivo.

(*) Proteccion inigualabel: Ota ofrece un garantia di fabrica di e motor lider den e industria, di 10 aña of 1 miyon Kilometer pa garantia di e motor, y un garantia di 7 aña (of 200.000 kilometer) di bumper pa bumper.

(*) Calidad comproba: Chery a wordo califica como e marca Chines di mas calidad door di J.D. Power durante tres aña consecutivo, y ta e marca di China mas confiabel na 2025.

(*)  Ingenieria ganador di premio: Aki ta enfoca riba e SUV serie Tiggo, incluyendo e Tiggo 8, cu ta ganador di UK Car of the Year, y Best Hybrid na Reino Uni.

(*) Versatildiad integral: E ta ofrece un gama amplio di modelo pa cada segmento, for di autonan compacto eficiente te cu SUV di luho, y pickupnan robusto.

(*) Siguridad sin concesion: Fabrica segun standardnan di siguridad global, nan modelonan mas recien a ricibi calificacion di siguridad di 5-Strea.

   Entrante awe Dialuna ya caba clientenan local por pasa na Ultimate Automobiles pa mira e modelonan di Chery cu a bin pa sacudi Aruba cu e mihor.