Turtugaruba un biaha mas ta entrega keho tocante cachonan riba beach

ORANJESTAD (AAN):  Tur e diferente especienan di turtuga cu ta pone webo na nos isla ta den peliger di extincion.

Turtugaruba ta preocupa cu ainda ta mira cachonan na eagle beach cu ta trapa y asta drumi riba neishinan di turtuga. E cachonan aki ta bira teritorial tambe ora voluntarionan ta bini pa inspecciona e neishinan pa posibel buraco di “hatchlings” (baby turtuga cu ta sali for di webo). 

            Turtugaruba den pasado a pidi e Dog Control Unit pa purba piki tur e cachonan na eagle beach. Pero e efecto lastimamente ta temporario. Hopi di e cachonan “nobo” aki no tin doño, hopi ta opera caba, pero nan no por keda eynan. Nos tin un Ley di Cacho, y tur hende mester tene nan cacho den nan cura. Turtugaruba no sa unda pa acudi e biaha aki paso e Unidad di Control di Cacho y Bureau City Inspector no ta activo riba e tereno aki mas. Strandpolitie? 

            Turtugaruba ta haci un suplica na tur fundacion cu ta bringa pa cacho na Aruba pa hunto nan busca un solucion pa cu e cachonan aki cu no por keda menasa y distrui e neishinan di turtuga. 

Turtugaruba ta pidi comunidad di Aruba cu ta desea di tin un mascota pa piki un of mas di e cachonan y hiba nan cas. 

            Turtugaruba ta pidi e turistanan pa no sigui cria e cachonan aki cu cuminda paso esey ta tene nan den e area. 

            Por ultimo, Turtugaruba ta haci un suplica na gobierno pa reactiva nan plan di piki e cachonan na beach pa hiba nan na e Centro di Control di Cacho. Mester un solucion urgente!