Giancarlo Nuñes di PNA:
ORANJESTAD (AAN) – Giancarlo Nuñez, funcionario di Parke Nacional Aruba, den entrevista cu DIARIO a comenta cu un hecho importante ta cu naturaleza ta tarda hopi pa regenera su mes.
Naturaleza ta crece den e sistema cu nos conoce awo, ciento te miles di aña pa regenera pero pa destrui naturaleza si ta bay hopi lihe. Si kita un pida mondi ta tarda un par di cien aña pa e mondi ey crece bek.
“E naturaleza cu nos tin awo nos mester zorg pa cuide pa e keda sano pa no keda atras, aworaki di biaha! No trece sushi den naturaleza y toch no bay cap mata. Ainda tin hopi hende ta cap mangel pa traha lugar pa sinta den sombra y cosnan asina, pero e mangelnan aki a dura miles di aña pa crece pa bo bay cap nan pa sinta den sombra, ta bay tarda miles di aña atrobe pa nan bin bek”, el a remarca.
PNA tin plannan pa bin cu instruccionnan pa e publico pa no corta e magelnan locual ta andando, y tin un proyecto unda ta enfoca hopi riba e areanan di mangel no solamente na Mangel Halto, pero Spans Lagoen y Isla di Oro tambe. Tur esaki ta inclui comunicacion cu pueblo di Aruba tocante e proyectonan aki, lo duna pueblo informacion tocante e sistema di mangel y kico pueblo mes por haci pa cuida nan y kico, como Parke Nacional, nan ta bezig cune te aworaki, pa restaura e areanan aki, cu ta wordo degrada durante e delaster cien añanan pa purba trece nan bek na un estado sano.
Pa ultimo, Giancarlo Nuñes a comenta cu door cu e awa a para keto na Mangel Halto esey ta e lugar na unda sangura por broei hopi bon den dje pero aworaki cu ta habri e fluho atrobe, e sangura no gusta ora awa ta move pero ademas, e pisca ta come e sanguranan y lo wak cu e situacion di sangura lo minimiza.
