Turistanan obliga na cana for di Terminal bay te na highway pa busca transporte

ORANJESTAD (AAN): E protesta di Taxistanan riba Diamars a escala di tal forma, cu nan a bay blokea tanto entrada di Teminal di Waf, y tambe entrada pa Aeropuerto di Aruba.

   Esaki tabatin consecuencia cu pasaheronan cu a caba di yega Aruba.  Dilanti terminal no tabatin ningun vehiculo di transporte, pues nan a wordo obliga na wanta nan yiunan, of carga nan baby, y lastra nan maletanan cana bay te na altura di spiral rotonde pa mira con por haya transporte.

   Riba Social Media por a tuma nota cu e accion aki di e Taxistanan pa defende nan derechonan, a crea disgusto enorme entre bishitantenan pa cu e caos cu tabatin dilanti Aeropuerto.

   Tur esaki debi na un decision unilateral, y “out-of-the-blue” cu Ministro di Transporte a tuma, cu a sorprende tur hende, incluyendo hopi hende liga cu Gobierno.  Tin hasta Taxista cu a aparece riba lista di Partido RAIZ cu a keda asombra y disgusta cu tur esaki.

   Con un Ministro den siglo 21 por hinca den su cabez pa introduci un medida sin sikiera tene reunion, of dialogo cu tur stakeholder, ta pone hende pensa cu tin metanan maligno hinca den tur esaki.

   Mientras tanto Ministro di Turismo, Dangui Oduber a haci un suplica na tur stakeholder pa por fabor no obstaculisa hopi e proceso di turistanan cu ta yega Aruba, y esnan cu ta rumbo pa Aeropuerto pa busca un vuelo.

   Hecho si ta cu e decision “out-of-the-blue” di Ministro aki a pone hopi turista keda disgusta.

   Pa evita congestion, Polisnan tambe a para pa asina desvia trafico y asina minimaliza e presion riba e rotonde.