Taxistanan cu accion masal pa manda mensahe cla y raspa

Ministro Ursell Arends no kier baha cabez

• Accion a escala y stroba hopi turista riba Diamars 

ORANJESTAD (AAN): E decision unilateral di Ministro usando excusanan fofo di supuesto ‘expertonan’, sin tene cuenta cu e tradicion di hopi tempo, combina cu e forma di proceder di Taxistanan na Aruba, ta treciendo problema den mundo di turismo.

   Ministro Ursell Arends a yora awor cu e forma di proceder pa cu asunto di vergunning di Taxi ta ‘unfair’ y a djis yega pone firma riba un Decreto Ministerial pa cambia algo cu a bira un costumber acepta cerca e embahadornan di turismo, esta chauffeurnan di Taxi.

   Ministro a yora cu tin hende cu a yega di bende vergunning di Taxi pa 90.000 Florin.  Pero Ministro no a check, con danki na e 90.000 Florin ey... cu e Taxista por a bay sikiera goza di un mihor pensioen awor cu el a stop di core como Taxi.

   Esey ta principalmente e motibo di con numeroso Ministro cu den pasado a keda encarga cu e cartera di Transporte Publico a keda permiti e bendemento di vergunning, y/of pasamento di vergunning pa miembro di famia.

   Sin ningun reunion cu stakeholder, of sikiera dialogo cu e Taxistanan, a djis yega y hisa benta e dos cambionan aki den scochi di Taxistanan, y bisa nan guli manda abao.

   Accion riba Diamars: Dialuna e Taxistanan a protesta dilanti Oficina di Gobierno y a haci entrega di un Manifiesto na Ministro.  El a indica cu e lo kier reuni cu nan riba Diamars.

   Diamars e reunion a tuma lugar, pero Ministro ta “deadset” pa mantene su decision.  Consecuencia di esey ta cu Taxistanan a escala nan protesta, y manera cu nan a priminti, mesora a bay y a bay protesta door di cera e entrada pa bay Aeropuerto, net na e Spiral Rotonde.

   Tambe a bay cera entrada di Waf, di tal forma cu Busnan grandi no por drenta ni sali.

   Debi na esaki, tabatin problema pa turistanan a yega Aeropuerto.  Transporte a bira un dolor di cabes y tur cos tabata bruha.  Aki por mira cu hasta for di banda di T-weg cerca di Pricesmart, e highway a wordo blokea.

   Dado momento polis tambe a dicidi na stop trafico cu ta bayendo pa Aeropuerto, y a cera caminda cu ta bay pa eynan.  Mas dolor di cabes y nerviosismo entre turistanan cu tin di bay Vliegveld pa nan vuelo.

   Blokea Boulevard tambe: Ademas di esey, e protestanan a bolbe ripiti su mes dilanti Oficina di Gobierno, aunke e biaha aki cu scala chikito.  Esey ta debi cu e demas Taxistanan ya caba a bay para na Waf of Aeropuerto.

   E exigencianan di Taxistanan ta simple:  Revoca e Decreto Ministerial sino protestanan lo escala.  E reunion di Diamars a keda sin trece solucion, y a bolbe pidi pa tene reunion riba Diaranson.

   Por a nota cu diferente Parlamentario di MEP a tuma parti pa e Taxistanan.  Esey ta debi cu pa hopi decada, MEP semper tabatin e pensamento cu ta OK pa Taxistanan bende of pasa over e vergunning pa otro hende.  MEP ta mira esaki como un sorto di “entrada extra” pa e Taxista awor bay goza di su pensioen.

   Cu e decision nobo di Ursell Arends, awor Taxistanan lo haya 0,00 cent ora cu nan no por core mas como Taxista.  Ademas a bin cu varios regla estricto cu por pone nan perde e vergunning si acaso nan comete violacion di reglanan.

   Den pueblo por a nota cu hopi hende a bin ta kehando, cu ultimo tempo algun di e Taxistanan ta bisti hopi slons ora di duna servicio na turistanan.  Esaki kizas por tin validez, sinembargo ya caba den e vergunning tin indicacion claro riba e forma di bisti di e Taxista.

   Sinembargo e topico principal ta e dos medidanan cu Ministro a tuma, y cu riba Diamars a ocasiona dolor di cabez net riba un dia cu tabatin hopi extra turista riba e isla.  Turistanan furioso cu no por a haya servicio te na Terminal di Aeropuerto, y algun hasta cu problema di cana, a haya nan ta rek e 200 pico meter pa yega na edificio di Terminal.

   Atrobe tin yamada di parti Taxistanan pa por fabor, e lider di Gobierno, esta Prome Ministro Evelyn Wever-Croes haci algo pa evita mas problema riba Diaranson.