Encuesta di 1522 turista a duna grado di satisfaccion y probabilidad pa regresa ta hopi halto
ORANJESTAD (AAN): Den e ultimo cuartal di 2023, Aruba Tourism Authority (A.T.A.) a actualisa su Encuesta di Sentimento di Bishitantenan (‘Visitor Sentiment Survey’) cual el a condusi como parti di e estudio di capasidad di carga na 2017/2018.
A.T.A. ta actualisando varios analysis di e rapport aki pa asina por compara e situacion actual cu esun di e momento na 2017/2018 (y den cierto caso cu mas momento unda a midi). Kier subraya e hecho cu A.T.A. mensualmente ta midi kico e bishitante ta sinti di su experiencia y ta raporta riba esaki mensualmente pa medio di su raport mensual di estadistica (‘Statistical Monthly Report’).
Tambe kier subraya cu ta midi e Sentimento di nos Residentenan tambe, a haci esaki e.o. na 2018 y 2022.
E estudio aki ta un replica di 2017/2018 unda a midi te na unda e grado di aceptabilidad ta bay ora ta trata e topico di multitud di hende (“crowdedness”) na e respectivo lugar. Pues e sentimento/percepcion di e bishitante ora e worde confronta cu e diferente nivel di multitud na e lugar. Business IQ hunto cu studiantenan di Universidad di Aruba a keda encarga pa ehecuta e estudio na 14 diferente lugar turistico rond di nos isla. E encuesta a worde haci bou di 1522 persona cu tabata bishitando nos isla.
A haci preguntanan tocante e probabilidad di e bishitantenan pa bolbe bishita e lugarnan aki si e condicionnan cambia. Aki ta papia di condicionnan manera cantidad di persona presente na e lugar y di e medio ambiente rond di elugar. E analisis a compara e resultado cu un estudio similar cu a worde haci na 2017/2018. Mester menciona cu tin algun lugar adicional cu a worde agrega na e estudio di 2023 pa yega na un total di 14 lugar. Entre elugarnan por conta cu: California Lighthouse, Alto Vista, Bushiribana, Casibari, Ayo Rock Formation Awards, Quadirikiri, Fontein y na diferente di nos beachnan.
Algun di e resultadonan principal di e Encuesta di Sentimento di Bishitanten ta inclui cu por lo general, participantenan di e estudio a experencia cu e lugarnan bishita no ta demasiado ocupa / yen di hende of demasiado satura.
Di un scala di 1 pa 5, caminda cu 1 ta hopi improbabel y 5 ta hopi probabel, bishitantenan a indica cu nan tin hopi probabilidad pa bolbe bishita elugarnan turistico caminda e encuesta a tuma luga.
For di e 14 lugarnan caminda e encuesta a tuma luga, mester menciona cu Baby Beach a worde clasifica como esun mas ocupa, sigui pa Eagle Beach, Palm Beach y Arashi. Ayo y Casibari a worde clasifica como e lugarnan menos ocupa.
Pa A.T.A., e opinion di nos bishitantenan ta crucial pa señala areanan cu mester di extra atencion y pa tuma medidanan. A.T.A. lo actualisa como tal e conseho y lista di posibel accionnan (inclui den e ultimo estudio), cu mester ser tuma pa contraresta desaroyonan negativo /y stimula esnan positivo. Mester subraya cu esaki ta otro esfuerzo di A.T.A. pa trece feedback concreto dilanti, pa asina conhunto cu esnan concerni .. tuma e accionnan debido.
A.T.A. su esfuerzonan local lo sigui ta enfoca riba entre otro (y den ningun orden di prioridad!): (a) e lugarnan mas bishita (b) riba nos playanan (c) nos hendenan/servicio (d) nos seguridad (e ) nos naturalesa y medio ambiente, y riba hopi mas.
