Ministro Geoffrey Wever:
ORANJESTAD (AAN): Minister Geoffrey Wever durante tratamento di begroting 2024 di Ministerio di Asuntonan Economico, Communicacion y Desaroyo Sostenibel den december 2023 a elabora riba e necesidad grandi pa un “koopkrachtmodel”.
Un “koopkrachtmodel” ta un instrumento di maneho pa midi e posibel impacto di maneho riba e poder di compra di hogarnan na Aruba. Pais Aruba actualmente no ta dispone di un modelo asina.
Basa riba peticion di Minister Geoffrey Wever Conseho di Ministroraad 12 di januari a duna aprobacion pa inicia e proceso pa traha un “koopkrachtmodel” pa Aruba.
Pa haci proyeccion di desaroyo di nos economia Departamento di Asuntonan Economico, Comercio y Industria ta haci uzo di e modelo macroeconomico MARUBA. Cu e modelo MARUBA no ta posibel midi e impacto di maneho riba e poder di compra di hogarnan na Aruba.
Un meta importante di maneho economico ta pa mehora e poder di compra di tur ciudadano. Pa logra e mehoracion di poder di compra ta necesario pa tin un instrumento manera e “koopkrachtmodel”. Un “koopkrachtmodel” ta haci posibel pa na un manera efectivo implementa maneho cu un impacto positivo riba e poder di compra na Aruba. Como instrumento di maneho, e “koopkrachtmodel” lo contribui na mehoracion di e poder di compra.
Pesey ta esencial pa aloca e fondonan necesario di mi begroting pa traha un “koopkrachtmodel” pa asina por tin miho bista con e poder di cumpra di hogarnan ta worde influencia ora ta implementa maneho segun minister Geoffrey Wever.
Ministerio di Asuntonan Economico, Comunicacion y Desaroyo Sostenibel lo sigui informa riba e proceso pa traha un “koopkrachtmodel”, un instrumento di maneho cu lo contribui na traha y implementa maneho.
