Diahuebs tin extravaganza di steelpan den caya principal San Nicolas

“Honor to Connor Steelband Extravaganza”

 *Dilanti Charlie's Bar den mainstreet na San Nicolas 

ORANJESTAD (AAN): Diahuebs anochi lo bay tin dushi musica di steelpan resonando na San Nicolas.

   DIARIO a haya sa cu ‘Sweet Pan Music Productions’ un biaha mas ta bay organiza e evento musical, ‘Honor to Connor Steelband Extravaganza’, y esaki lo ta e di tres edicion di e evento.

   Na e actividad aki nan lo recorda e fecha natal di e Pionero y Legendario den musica di Steelpan Sr. Edgar Connor (d.f.m.) tata di nos artistanan grandi den musica di Steelpan, Nico Connor y Lee Connor.

  Nan lo conmemora y honra Sr. Edgar Connor cu e evento musical aki dedica na su memoria. Sweet Pan Music bou direccion di Nico Connor y Aruba Panman Foundation bou direcion di Lee Connor semper a mantene e musica di Steepan bibo y hibe tambe den educacion di nos muchanan y nan lo keda crea diferente plataforma pa sigui encurasha otro Steelbands, Steelpan Players, y crea e interes entre hobennan pa e instrumento di Steelpan pa asina sigui aporta na e herencia musical di Steelpan y aporta na Cultura di Aruba.

   Nan ta invita e pueblo di Aruba pa assisti na e evento musical aki dedica na Sr. Edgar Connor (d.f.m.) riba su fecha natal y tambe celebrando Carnaval su di 70 aniversario den cual Sr. Edgar Connor a aporta en grande cu su musica di Steelpan. E evento aki cu lo tuma lugar Diahuebs dia 18 di Januari 2024 den mainstreet na San Nicolas dilanti Charlie’s Bar, y e ta completamente gratis pa e pueblo di Aruba por disfruta di dje.

   Artistanan Steelbands cu lo forma parti di e programa ta: "The Boyz Dem", "Jeremy Lampe & Friends", "Studiantenan di Aruba Panman Foundation", "The Aruba Invaders", y "Nico Connor - Lee Connor".