Turista mester a wordo evacua cu urgencia for di un barco crucero 

Wardacosta

ORANJESTAD (AAN): Diabierna mainta, 27 di februari, Centro Operacional Maritimo  (MOC)  di Wardacosta a ricibi un yamada for di un barco crucero den necesidad di asistencia medico. E barco tabata nabega noord di Aruba. 

Ta trata di un hende homber turista di nacionalidad Aleman di 76 aña di edad, cu ta sufri di pulmonia. Na un dado momento e problema di respiracion tambe a afecta movecion di e persona su curpa.

Personal di MOC a tuma contacto cu e medico di CITRO na Corsou, cu a constata cu e persona mester ricibi tratamento medico mas lihe cu ta posibel. 

Inmediatamente a alerta personal di e helicopter di Wardacosta pa sali den direccion di e barco, pa asina por hiba e pashent Queen Beatrix International Airport na Aruba. 

Miembro nan di ambulance tabata presente na aeropuerto pa asina hiba a turista hospital pa ricibi tratamento medico.