Señora Luenne Gomez-Pieters:
ORANJESTAD (AAN): Den e Regulacion di tratamento fiscal di beneficionan laboral secundario tin diferente tema cu ta wordo trata den cual ta splica e impacto fiscal. Entre otro, tin un suma adicional pa uzo di auto di compania. Esaki ta wordo considera un beneficio laboral. Tambe, tin compensacionnan, liber di empuesto, pa gastonan pa auto priva of telefoon priva cu ta wordo uza pa e empresa. Tambe ta regula pagonan, liber di impuesto, cu ta cubri gastonan di empleadonan pa mantene of mehora nan salud, sea ta gym of algo cu ta mehora nan salud fisico of mental. Tambe tin regula gastonan pa mantene of mehora conocemento di empleado.
Directora di Departamento di Impuesto, Señora Luenne Gomez-Pieters, den un entrevista recien cu DIARIO a splica cu ‘Expatregeling’ ta un beneficio cu ta regla den e regulacion aki. Ora ta papia di un expatregeling, mester tin un dunador di trabao. Segun e regulacion, studiantenan cu ta bibando afo pa 5 aña prome cu cuminsa traha na Aruba, tin experiencia, tin un HBO opleiding, por aplica pa un expatregeling. E por aplica dentro di 4 luna despues cu su relacion di trabao na Aruba a cuminsa. E doño di trabao ta haci e peticion na inspector di impuesto. Doño di trabao y empleado ta firma e peticion.
Señora Gomez-Pieters a duna un lista di tur documento cu mester wordo entrega, entre otro e curriculum vitae di e expatriate, copia di su diplomanan y certificadonan, permiso di estadia, copia di acuerdo laboral pa confima cu ta emplea na e compania. Esaki, segun el a splica, ta procesonan existente y recien a habrie pa otro tipo di expertonan y expertonan local cu lo kier bin bek Aruba y haci uzo di e regulacion aki.
Señora Gomez-Pieters a sigui splica e beneficionnan fiscal cu ta mara na un expatregeling pa studiantenan cu ta bibando afo. E compensacionnan aki, sea na placa of natura, no ta carga impuesto si nan no ta sobrepasa e suma di 20 mil Florin pa aña. Tambe pa doñonan di trabao cu ta paga cierto suma pa cubri gastonan di scol di yiunan di un expatriate, e lo ta liber di impuesto te un suma maximo di 25 mil Florin pa cada yiu.
“Esakinan ta algun di e beneficionan fiscal cu ta wordo regla den e regulacion aki. Esakinan ta compensacionnan secundario cu doñonan di trabao tin como herment pa brinda e experto cu tin 5 aña di experiencia, y haci esaki mas atractivo pa bin di afo y traha na su empresa na Aruba. Esaki ta un experto mas cu nos ta trece Aruba”, Señora Gomez-Pieters a menciona.
