ORANJESTAD (AAN): Directiva di Centro di Bario Santa Cruz ta sumamente contento y gradicido di a ricibi for di CEDE ARUBA
e tremendo noticia cu CdB Santa Cruz a bin na remarke pa un subsidio substancial for di Samenwerkende Fondsen Cariben (SFC). Cu e subsidio aki CdB Santa Cruz lo bay den un proceso acelera di por ofrece un programa structura pa comunidad di Santa Cruz.
Cu e fondo aki di SFC lo bay ofrece lo siguiente:
- Huiswerkbegeleiding & Naschoolse opvang pa muchanan y hobennan di bario cu ta bayendo Scol Secundario.
- Educacion Basico: Esaki ta un bon oportunidad pa personanan cu no a logra caba nan scol.
- Actividad pa 60+. Diferente actividad pa personanan 60+ di e bario.
- Les di futbol: Lo haci uso di e Turf di futbol di CdB Santa Cruz, lo brinda e oportunidad na muchanan di bario – mucha muhe y mucha homber- pa siña e deporte di futbol.
- Workshop pa tatanan di bario. Pa yuda e tatanan den nan tarea responsabel cu nan tin como tata, con nan ta/por maneha e tarea aki. E focus lo ta riba e importancia di e tata den bida di su yiu(nan).
- Descubri talento: Ta ofrece e oportunidad na muchanan y hobennan descubri nan talento, por medio di ofrece nan les di musica, nan por descubri nan talento musical.
Parti di e fondo ta destina tambe pa cubri diferente gastonan operational di CdB Santa Cruz, manera gastonan di utilidad, limpiesa, etc..
Centro di Bario Santa Cruz ta un di e centronan di bario cu ta forma parti di e proyecto BARiO UNICO di CEDE ARUBA. Por informa cu e afiliacion aki ta dunando su frutanan. Entre otro por menciona cu atrabes di BARiO UNICO a logra contrata un Programmaleider pa atende cu e Centro di Bario y pa bin cu actividadnan pa e bario. Tambe BARiO UNICO ta ofrece guia y sosten na e centro di bario. Alabes ta yuda pa genera fondonan necesario pa por logra haci e trabou di e centro di bario cada bes mas mihor. Un di e fondonan aki ta e asina yama “Microbudget”. Cu e fondo aki CdB Santa Cruz por adkeri diferente articulo necesario pa por brinda un mihor servicio na su clientenan. Tambe a logra haya subsidio pa organisa fundraising, pa locual a orgainsa un “Family Fundraising Day” cu a tuma luga recien. Tambe ta organisando mensualmente un “Ban Conecta den Bario”, pa di e manera aki stimula e bario pa traha pa e bario. Tur diabierna tambe tin “Lead by Design” specialmente pa e hobennan. Un proyecto bou encargo di Sra. Sharleen Tromp y financia entre otro pa CEDE ARUBA.
Tin hopi actividad cu a tuma luga caba, tin ta tumando luga y tin hopi mas na caminda. Cu cooperacion di diferente persona- y organisacionnan ta ofrece e siguiente actividadnan, charlanan y workshops. Tur ta gratuito.
Tur dialuna mainta: Fysiofit pa 60+ bou guia di fysioterapista Sra. Yvonne Andrade di Fundacion Movemiento ta Bida.
Aki ta sigi oportunidad pa participa na Charlanan y workshops.
14 mei. Sesion informativo di “Dementia” - Cas Marie – Lisette Does
11 juni. Workshop “Balornan y Virtud” – Mente Positivo - Belquis Moreu
9-11 juli Workshop “Finansas den mi hogar”, Fundacion Plan di Bida
20 aug. Workshop “Energia Universal” – Mente Positivo - Belquis Moreu
17 sep. Presentacion “Relacion Sano” - Fundacion Contra Violencia Relacional - Cinthia Quant
15 okt Workshop “Salud di pecho: deteccion trempan” - Stichting BOB Aruba - Diantha Neusch
12 – 13 okt Workshop “Metanan Financiero” - Fundacion Plan di Bida. Solamente e Reader ta
costa Awg 10,-
10 dec Workshop “Amor Propio” - Mindfull Love Aruba - Sabrina Sonensein
Centro di Bario Santa Cruz ta hopi gradicido pa tur yudansa y cooperacion cu ricibi y ta ser ricibi ainda for di comunidad. Ta hopi ta e personanan, companianan y fundacionnan cu ta brinda nan aporte di curason pa asina contribui na comunidad di Aruba en general y na Santa Cruz en particular.
Centro di Bario Santa Cruz ta invita pueblo di Aruba en general y e dushi comunidad di Santa Cruz en particular pa bishita nos Centro di Bario, pa participa cu actividadnan of pa bira boluntario. Trahando hunto so nos por bay dilanti y realisa e cambionan duradero y di largo plaso cu nos ta desea pa nos comunidad.
