ORANJESTAD (AAN): E tabata gusta vakantie, y pa 20 aña largo e tabata bin goza di su dianan liber na Aruba. E tabata bisa tur hende cu “Aruba is my happy place”.
Pero recientemente, Suzanne Augustine di 74 aña di edad a fayece na su cas na North Venice, na Florida. E momento ey su casa Theodore Augustine, y su yiu homber Steven Michael Augustine tabata hunto cune.
El a nace na Buffalo na New York, y despues di gradua na South Park High School na 1964 el a casa cu Ted.
Durante su matrimonio di 52 aña, nan a biba na varios estado na Merca. E tabata un boluntario activo na varios scol y instancia caritativo.
E tabata viaha semper cu amigonan rumbo pa Aruba, y a introduci mas hende pa a bin Aruba y disfruta di e bon bida aki.
Dia 4 di Januari 2022 lo bay tin un memorial na su honor na West Seneca na new York.
