Bestaansminimum pa November a subi cu 137 Florin

Indice di Prijs di Consumo pa luna di November 2021

ORANJESTAD (AAN): E asina yama Indice di prijs di Consumo CPI pa luna di November 2021 ta 99.90, loke ta representa un subida di 0.6% compara cu e indice di October 2021 (99.31) y acumulando un subida di 2.9% te cu na November di e aña aki.

   E cambio di e CPI pa e ultimo diesdos (12) lunanan (November 2020 te cu November 2021) ta 3.1%, un subida di 5.8 punto di porcentahe (ppt) compara cu e periodo corespondiente di aña pasa (-2.7%).

   E promedio anual di e tasa di inflacion pa e periodo di November 2020 te cu November 2021 ta 0.2%, un caida di 1.0 ppt compara cu e -0.8% registra den e periodo di November 2019 te cu November 2020.

   Durante e luna aki, ocho (8) di e diesdos (12) sectornan a registra subida di prijs. E subidanan cu tabata tin e mayor efecto riba e CPI a worde registra pa e sectornan di “Vivienda” (1.2%), “Recreaccion y cultura” (2.3%) y “Transporte” (1.6%), causando un efecto di 0.30, 0.23 y 0.21 ppt. E subidanan den e restante sectornan a contribui cu un efecto di 0.30 ppt riba e CPI di November 2021.

   E subidanan aki a worde contraresta parcialmente door di principalmente un caida den e indice di e sector di “Mobilario” (-2.3%) cu a contribui cu un efecto di -0.21 ppt riba e CPI di November 2021. E caidanan den e restante sectornan a contribui cu un efecto di -0.22 ppt riba e CPI di November 2021.

   E subida den e sector di “Vivienda” a worde causa door di principalmente un subida den e categoria “Mantencion y reparacion di vivienda” (5.3%), causando un efecto di 0.28 ppt. E subida den e sector di “Recreaccion y cultura” a worde causa principalmente door di un subida di 5.2% den e categoria “Vacacion”, causando un efecto di 0.16 ppt. E subida den e sector di “Transporte” a worde causa principalmente door di un subida di 2.8% den e categoria “Gasto relaciona cu uso di vehiculo di transporte personal”, causando un efecto di 0.23 ppt.

E caida den e sector di “Mobilario” a worde causa principalmente door di un caida den e categoria “Aparato pa uso domestico” (-9.1%), causando un efecto di -0.22 ppt.

   Canasta di consumo:  E canasta di consumo di e CPI ta consisti di 408 bienes y servicionan. Compara cu 2021, 48.8% di e bienes y servicionan aki a conoce un aumento di prijs causando un efecto di 1.47 ppt, mientras cu 33.6% ta mustra un caida di prijs, cu a contribui cu un efecto di -0.87 ppt y pa e restante 17.6% no tabata tin cambio den prijs.

   Prijsnan di bienes a subi cu 0.7% y a causa un efecto di 0.40 ppt. Prijsnan di servicionan a conoce un subida di 0.5% y a causa un efecto di 0.20 ppt riba CPI di November 2021.

    Core inflation:  E CPIC (core inflation) - CPI excluyendo e efecto di energia y cuminda - a registra na November 2021 un caida di 0.7%. E indice di energia - cu ta consisti di e productonan: electricidad, awa, gasolin y diesel a registra un subida di 5.1%. E indice di cuminda a registra un caida di 0.9%.

    Bestaansminimum: E bestaansminimum pa un hogar consistiendo di 2 adulto y dos mucha (edad 0-15 aña) na November 2021 ta Afl. 4,896.

   Esaki ta un subida di Afl. 137 compara cu November 2020 (Afl. 4.759).

   E bestaansminimum pa un hogar di 1 adulto ta Afl. 2,331, un subida di Afl. 65 compara cu November 2020 (Afl. 2.266).