Turismo ta reinverti den un Aruba mas limpi cu apertura oficial di Zona di Desperdicio

Minister Wendrick Cicilia:

ORANJESTAD (AAN): Dialuna a marca oficialmente e prome dia di operacion di e Zona di Desperdicio permanente na Barcadera, un iniciativa cu ta representa un paso importante den e esfuerso continuo pa mantene Aruba limpi, organiza y sostenibel.

   Durante e conferencia di prensa, Minister di Turismo, Transporte y Labor, mr. Wendrick Cicilia, a enfatisa cu e proyecto ta resultado di un vision ministerial unda ta reinverti exito di turismo directamente den mehoracion concreto pa nos isla y comunidad.

   A traves di Aruba Tourism Authority (A.T.A.) y cu apoyo for di e presupuesto di Government Initiatives (ESG/Duurzaamheidsfonds), Gobierno a logra dirigi fondonan pa atende reto structural relaciona cu limpiesa y maneho di sushi.

   “Turismo mester trece beneficio directo pa nos pueblo. Ora nos reinverti den un Aruba mas limpi, nos ta inverti den calidad di bida di nos comunidad y den e experiencia di tur esnan cu ta bishita nos isla,” Minister Wendrick Cicilia a expresa.

   E Zona di Desperdicio permanente ta brinda un punto central p’e ciudadanonan deshaci di bulky waste, manera sushi di cas y otro material grandi, asina tambe sushi di hardin, eliminando dependencia di e sistema temporal di ‘Baki den Bario’.

   Segun Minister Cicilia, e iniciativa no solamente ta aporta mas comodidad pa comunidad, pero tambe ta yuda preveni cu sushi ta keda acumula den e barionan y ta reduci e filanan largo cu anteriormente tabata un reto pa hopi.

   Relatonan di A.T.A. ta mustra consistentemente cu limpiesa di Aruba ta entre e motibonan mas importante pakico e bishitantenan ta aprecia nos isla y ta scoge pa bolbe. Pa e motibo ey, inversion den un Aruba limpi ta un inversion directo den nos calidad di bida y nos producto turistico.

   Gobierno lo conduci un evaluacion despues di seis luna pa analisa uzo, impacto y e posibilidad pa sigui expande e concepto den diferente parti di Aruba.

   “Un Aruba limpi ta responsabilidad di tur hende. Gobierno ta pone e infrastructura, pero exito ta depende di un esfuerso colectivo pa cuida nos isla,” Minister Cicilia a finalisa bisando.