Ronica Lopez kende ta Hefe Mercadeo Setar NV
ORANJESTAD (AAN) Ronica Lopez, Hefe di Mercadeo na Setar NV, a hiba palabra den conferencia di prensa, relaciona cu e firmamento di sponsorship FIFA World Cup 2026, pa formaliza e transmision oficial di Telearuba, di e 104 partidonan di e Copa Mundial di Futbol 2026.
Lopez a expresa cu Setar ta hopi orguyoso y contento di ta presente, na e momento importante aki, cu e tremendo anuncio, cu momento a yega pa firma contrato cu FIFA.
“Algo cu nos a anhela pa hopi tempo. Nos tin hopi tempo bezig cu esaki. E no tabata negociacionnan facil cu FIFA e biaha aki. Nos ta duna danki y pabien na Giovanni Kock, director di Tele Aruba y e team completo di Telearuba. y e coleganan di Setar cu a asisti den esaki y a haci posibel cu nos por firma.
Mi ta kere e ta un noticia hopi importante y hopi positivo pa henter pueblo di Aruba”, Ronica Lopez a expresa.
El a menciona cu pa pueblo di Aruba futbol ta grandi, y tempo di Copa Mundial nan ta wak television den famia y cu amistadnan, un momento pa ta hunto cu otro y hasta pa discuti pasobra cada ken ta apoya otro team, pues e ta trece un union tremendo den comunidad, comparti cu otro momentonan emocionante.
“Y principalmente aworaki cu nos ruman Corsou ta den dje, mas motibo ainda pa nos ta pega na nos television pa apoya nan den tur esaki”, Ronica Lopez a bisa.
