Ronella Croes, CEO di ATA:
ORANJESTAD (AAN) – CEO di ATA, Ronella Croes, a splica cu Aruba su turismo for di Latino America a sigui crece, no obstante e aumento basta significante den costo di biahe pa Aruba.
“Tanten cu esey ta duna bo ta mira cu esnan cu ta den e negoshi ta sigui purba di push’e mas. Dus, no a mira un disminucion di bishitante, al contrario, pues nos no a mira un reduccion di loke nan ta laga atras den nos economia.
Nos ta premira, y asina Banco Central a cera 2024, cu e entrada directo, tourism receipt, pa di medio turismo lo por crece cu 16% versus 2023.
Si wak aña pasa cu nos a cera cu un cantidad di bishitante cu 13% di crecemento, y bo entrada directo ‘tourism receipt’ ta 16%, mi ta kere cu e patronchi di gasto tambe ta na su lugar, y nos ta keda monitorea esey.
Pues, si tin motibo pa cambia di strategia por haci esaki. Locual ATA ta para p’e semper, y esey mester keda presente, of sigur, haci di nos banda, ta cu e bishitante haya cu ta bale la pena pa paga e prijs eynan”, Ronella Croes, CEO di ATA a señala.
El a agrega cu esaki, por lo general, ta score hopi bon tambe. “Nos tin resultadonan di 2024 cu nos a monitorea mensualmente, y nos por ta hopi auto critico riba hopi cos, y hopi cos mester atencion, y no tur hende ta keda mesun satisfecho, pero, por lo general, nos bishitantenan ta score Aruba hopi bon.
“P’esey nos mester keda wanta y eleva e producto si. No kiermen, cu no mester haci nada, mester sigui eleva e experiencia ey”, Ronella a remarca.
El a señala cu e plannan di mercadeo pa Latino America ta den ehecucion aworaki. “Pero recientemente, mirando e desaroyonan na Merca, principalmente, aworaki nos ta activando extra iniciativanan. Iniciativanan di e fase aki, ta dirigi mas bien cu nos ta asegura cu nos tin mas asiento aereo. Esaki ta e prome paso di loke nos ta haciendo adicional”, Ronella Croes, CEO di Oficina di Turismo di Aruba a indica.
