En espera di contesta si Reino ta proteha Aruba contra cyberattack
*Sobrevivencia propio di e Hulandes y e paraiso perdi pa migrante
*Aumento gasto pa Defensa contra Cyber ta yuda crea Hulanda Pichiri
ORANJESTAD (AAN) — “Bobbejaan klim die berg, om die Rooinek te vererg. Hoera fir die Boer, Hoera.”
Un cantica cu a nace den historia di Reino Hulandes durante e temporada di e “Nederlandse Kaap Kolonie”cu awe tin e nomber di Äfrica del Sur”.
Bobbejaan ta e macaco “baviaan”, cu mester a bira fastidio di e Boer of e Rooinek, segun e grupo cu tabata na mando.
E cantica ta na e idioma Zuid Afrikaans, cu no ta nenga cu Africa del Sur tambe tabata parti di e colonianan Hulandes hopi tempo pasa y como tal tabata parti di e proceso historico, cu a haci cu Hulanda a conoce migracion tanto di Hulandes pa e colonianan como di e colonianan pa Hulanda.
Un situacion cu a entrega Hulanda na Siglo 20 sigur, obligacionnan cu a hiba Ambonezen, Molukkers, habitantenan di Indonesie, pues e parti di Reino conoce como Oost Indie, na e cas Hulandes na Europa.
E migracion di paisnan Oriental pa Hulanda, tabata mara na guera den e parti Oriental di mundo y cu un dia DIARIO lo presenta en extenso.
Siglo 20 a cualifica su mes como epoca di deconolonisacion cu resultadonan importante cu hopi bez ta bay perdi den historia di Reino, cu a bira conoci como un asilo pa personanan cu sea pa nan afiliacion Hulandes of situacionnan politico na nan pais, tabata tin necesidad di un cas.
Reino a conoce cambionan importante na Siglo 20 cu hopi bez ta bay perdi den historia aunke nan tin resultado importante sigur pa e forma cu comunidadnan nobo a nace na Hulanda meymey di e comunidad Hulandes.
Hulanda na Siglo 20, mas ainda despues di Segunda Guera Mundial, a conoce un crecemento di su poblacion a base di migracion for di su teritorionan pafor di Europa, cu a reconoce na Hulanda e posibilidad di sobrevivencia y progreso cu no tabata existi na nan pais.
Independencia di Surinam a conduci na migracion di un grupo grandi di poblacion di e pais pa Hulanda, manteniendo asina nan nacionalidad Hulandes, aunke na Hulanda nan por a mantene un parti grandi di nan tradicionnan nacional.
Necesidad di trahador na Hulanda a habri porta pa hopi trahador di region Caribense busca y acepta trabou na Hulanda, caminda nan generacionnan nobo a nace.
Hulanda ta un pais chikito den Reino, pero ta e pais cu a construi su propio teritorio cu el a reclama for di laman, cu a bira su porta pa un economia fuerte, como un entrada maritimo pa Europa.
Asina “gastarbeiders”di diferente pais na mundo, a bira parti di Hulanda, cu a duna trabou na su expertonan cu for di colonianan Hulandes y otro paisnan, a educa nan mes na e nivelnan mundial mas halto y reconoci mundialmente pa educacion.
Hulanda a bira un asilo tambe pa paisnan sigur na Europa, cu a conoce dictadura y asina a haya nomber di “paraiso social”cu leynan social unico, cu ta garantisa un bon nivel di bida na tur su habitantenan.
Mientrastanto Hulanda tambe a cuminsa conoce problema cu e mester a atende. Na 2025 loke tabata spera, a wordo expresa siman pasa dor di Ministro Hulandes Faber, cu a anuncia cu Hulanda no ta un paraiso social mas y cu e Hulandes mes ta den problema di un mundo cu ta exigi maneho responsabel den e realidad actual.
Ministro Faber a reitera su maneho di austeridad y a indica cu no ta existi un paraiso cu e nomber ‘Hulanda” cu mester corta den e ayudo cu e ta brinda.
E anuncio a bini na momento cu Hulanda mester atende cu su defensa, manera na hopi momento DIARIO a trece dilanti den un situacion di amenaza continuo di guera, den cual e Alianza Noord Atlantico NATO, mester sigura cu e por contesta cualkier peligro.
Uno di e peligronan aki ta e preparacion contra un Cyberattack, cu lo exigi 1.5 porciento di e 5 porciento total cu cual lo subi gastonan di defensa.
E necesidad di e cyber attack a presenta e dianan aki e imagen di un Hulanda Pichiri, cu mester uza su placa pa su mes sigur pa defensa di su pais.
Aki ta caminda e rabo di porco ta krul. Hulanda ta encarga cu defensa di Aruba, cu tambe mester prepara pa Cyberattack, manera DIARIO a splica.
Segun Statuut Hulanda ta encarga cu asuntonan di defensa di Aruba. E 1.5 porciento extra na defensa, lo ta pa defensa di Aruba tambe contra Cyberattack?
Un epoca nobo a bati na porta di mundo y Reino. Por papia awor di un paraiso pais pa resto di Reino?
DIARIO ta sigui traha riba e contesta den un situacion mundial cada rato mas interesante.
