DIMAS ta sigui traha duro pa haci e procesonan di peticion mas facil

ORANJESTAD (AAN): DIMAS  trahando duro pa haci e procesonan mas eficiente y facil pa e hendenan cu kier haci un peticion pa cumpli cu esaki, segun director di DIMAS Kathy Paskel.

“Den e trayecto aki tabata tin inversionnan unda cu nos a inverti den un portal y ya caba mas cu 80% di nos peticionnan no ta drenta via un intaker di DIMAS, pero ta esun mes cu ta bay dune e trabao ta esun cu ta aplicando na DIMAS y tin e acceso na e portal, cu e por pidi pa e empleado bay traha pe”.

Si bo aplica na un empresa y e empresa tin un portal, bo no tin e necesidad pa busca un tercer persona pa por pidi pa yudabo den e proceso di haci e permiso, segun Paskel.

Esaki el a bisa den un entrevista cu DIARIO.

E director di DIMAS a sigui bisa cu si bo opta pa haci esey toch, esey ta un escogencia cu bo ta haci como persona y e ora ey e ta algo entre abo y e persona ey y naturalmente si e no cumpli, DIMAS no tin ni arte ni parte den esey.

“Esunnan cu nos a facilita un portal ta esunnan cu a haya training na DIMAS”.

Nan a haya tambe acceso riba locual ta maneho y ley, pues riba kico ta e posibilidadnan pa pidi permiso.

Nos ta monitor si con e uso di e portal ta bay y clientenan cu a haya e portal y ta haci mal uso di esey, nos ta cerando nan tambe, segun Paskel.

El a splica cu DIMAS ta hopi contento cu ta yegando 82%, unda cu a haci tur cos den tres fase.

Prome a haci esaki pa empresanan grandi, despues tur otro empresa por a sluit aan y awor a yega na e fase unda cu e individuo mes tambe por pidi pa e ta parti di e portal.

Paskel a splica si cu ainda tin algun reto tecnico cu ta wordo atendi cune.

“Nos ta spera di por yega 100% hopi pronto”, segun e director di DIMAS.