ORANJESTAD (AAN): Un bon noticia cu Minister Dangui Oduber a comparti cu comunidad ta cu turismo crusero lo ta bek den luna di Juni proximo.
Kiermen cu Aruba lo bay ricibi e prome barco crusero cu ta bay ta e Celebrity Cruise Line cu e linea di mas 'upscale' di Royal Caribbean Cruise Lines.
E lunanan cu ta sigui ta anticipando tambe un crecimento substancial den e cantidad di bishitantenan crusero y esaki ta crea e perspectiva positivo cu mester despues di un aña hopi dificil y cu a manda turismo di Aruba 30 aña bek, a splica.
E ta bay ta un yegada gradual di e turismo crusero. Ta bay cuminsa cu un 'call' tur siman den luna di Juni y cu un capacidad di 50% (entre 1500 pa 1800 turista crusero) tur siman, entrante e luna di Juni.
Ta bay ta un tiki lento, mescos ora a habri e frontera aereo den luna di juli 2020, a señala.
Awe por mira cu Aruba ta recuperando hopi mas lihe cu tur e competidornan den Caribe. Por mira tambe e confiansa cu e aerolineanan tin den economia y turismo di Aruba pasobra ya caba e cantidad di asientonan disponibel pa aerolineanan americano ta surpasando e nivel di aña 2019 cu tabata un aña record, e mandatario a indica.
E mercado mericano tambe ta bay 'pick-up' ya cu esaki ta un mercado hopi solido y ta mira cu e mericano kier viaha. Nan ta sint safe cu e protocolnan cu tin na Aruba y cu e grado di vacunacion cu Aruba ta alcansando, a remarca.
Aruba ta e di dos pais na mundo cu a vacuna mas hopi hende den su populacion y esaki ta un di e criterianan cu CDC di Merca ta uza pa duna recomendacion na e viahero mericano. Ta pesey tambe Aruba ta avansando y acelerando den e recuperacion turistico, Oduber a expresa.
E proyeccion ta cu pa fin di aña lo bay yega entre 40 cu 50 porciento di e cantidad cu ta yega normalmente den un aña pa loke ta turismo crusero. Esaki ta significa cu lo por cera aña cu entre 200 mil cu 300 mil turista crusero. Den un aña record, manera 2019, a cera cu casi 900 mil turista crusero, e mandatario a duna di conoce.
E protocolnan pa e barconan crusero ta hopi stricto. Tur persona cu ta bay aborda e barco mester ta vacuna y tambe haci nan PCR Test prome cu subi barco. Ta protocolnan casi mescos cu loke tin na aeropuerto y cu a demostra cu a duna e resultado cu tabata kier ora cu a habri e frontera aereo, a agrega.
