DEN HAAG: E decision a cay riba Diabierna! Conseho di Ministro di Reino a dicidi pa suspende e pago
cu nan a bay di acuerdo cune pa e di cinco tranche di 39 miyon Florin na sosten pa liquidez pa St. Maarten.
Secretario di estado Raymond Knops a confirma esaki, na momento cu e hunto cu Prome Ministro Silveria Jacobs a sali for di e reunion di Conseho di Ministronan di Reino.
Segun Raymond Knops, e punto di agenda relaciona cu pago di e di cinco tranche pa St. Maarten a wordo discuti na forma amplio. El a bisa cu decision a cay cu ta pospone e decision di 23 di April pa paga e placa aki, te ora cu good governance wordo restaura bek na Princess Juliana International Airport.
Knops a indica cu e decision di Diabierna a wordo tuma tambe basa riba un carta cu el a ricibi Diahuebs anochi di Royal Schiphol Group (RSG). “Den e carta ey a ser mustra cu aunke Gobierno di St. Maarten a tuma pasonan positivo pa soluciona e problemanan, toch RSG no ta considera esaki suficiente pa nan keda na e Aeropuerto,” el a bisa.
Conseho di Ministro di Reino a duna tanto Raymond Knops, como tambe Ministro Hulandes Wopke Hoekstra y Prome Ministro Mark Rutte e mandato pa autoriza e traspaso di e placa di e di cinco tranche, ora cu good governance a wordo restaura suficientemente na e Aeropuerto, cual decision lo wordo basa tambe riba informacion di RSG. Esey nifica cu no mester tene ningun otro reunion di Conseho di Ministro di Reino mas pa paga e tranche.
Prome Ministro Jacobs a bisa cu el a keda hopi desapunta. “Definitivamente mi no ta contento cu e decision aki. Mi ta sinti cu e decision a wordo tuma caba anteriormente dia 23 di April, y cu nos no mester wordo castiga pa reto- y asuntonan cu ta presenta nan mes despues di e fecha ey,” el a bisa. Aki el a nota cu e no tabatin problema pa agrega e reto- y asuntonan aki pa papia riba e futuro sosten di liquidez.
“Mi ta haya hopi desafortuna cu e reglanan di e orden ta wordo destrui door di tuma un segundo decision riba algo cu ya caba a dicidi riba dje. Mi a spera algun comprondemento y sosten den consulta continuo, pero desafortunadamente e decision di Conseho di Ministro di Reino mas mainta ey no a cambia,” Jacobs a bisa.
Prome Ministro di St. Maarten a bisa cu awor cu no ta transferi e placa, Den Haag ta afecta “e hendenan cu mas mester di dje. E no ta mishi riba corporate governance na Aeropuerto of otro asuntonan cu nan ta drechando aworaki na Aeropuerto.
Knops a reacciona riba e remarkenan di Jacobs, door di bisa cu good governance semper tabata un punto importante den na colaboracion cu St. Maarten, no djis awor durante e asunto di tranche di placa, pero tambe pa cu e reconstruccion di e isla despues di Horcan Irma.
“Nos ta pone hopi balor na e opinion di Royal Schiphol Group y con pa maneha un Aeropuerto basa riba good governance. E tarea cu Gobierno di St. Maarten awor ta enfrenta, ta pa pone tur cos bek na ordo lo mas pronto posible. Mas rapido, ta mihor. E speranza tey cu por tuma un decision positivo den termino corto encuanto pago di e sosten di liquidez basa riba un evaluacion di Royal Schiphol Group,” Knops a bisa.
