ORANJESTAD (AAN): Fiscal a informa, cu e proceso di interogacion di e sospechosonan Leoncita Arends, Franklyn Abath, y Freddy Every a keda cla y no ta mira necesidad pa nan keda encarcela mas.
Pesey mes riba peticion di Ministerio Publico, Huez-Comisario riba Diabierna atardi pa 3:30 pm, a suspende detencion den e casonan contra e sospechosonan Leoncita Arends, Franklyn Abath, y Freddy Every, pero esaki ta socede mara na condicionnan.
Banda di condicionnan general, huez-comisario a pone como condicion especial cu e sospechosonan ta prohibi di tin contacto cu cierto personanan y cu nan mester coopera cu e investigacion.
Tambe demas Huez Comisario a trata Diabierna atardi e peticion entrega door di Ministerio Publico tocante detencion di e sospechoso Pieter Th.A. Susebeek.
Huez-comisario a duna ordo pa detencion (gevangenhouding) di Susebeek y a dicidi cu e sospechoso aki tambe lo keda den detencion pa awor.
PROLONGA PA BENNY:
Manera a ser treci dilanti caba, Diaranzon cu a pasa e sospechonan Oslin ‘Benny’ Sevinger y su casa Claudia M. Castano Henao a keda deteni.
E relato di Ministerio Publico ta mustra cu Parlamentario Benny Sevinger ta worde sospecha di a comete varios hechonan castigable entre otro, soborno (omkoping), abuso di cargo (ambtsmisbruik), labamento di placa (witwassen) y participacion na un organizacion criminal (deelname aan een criminele organizatie).
Su casa Claudia Sevinger-Castano Henao ta worde sospecha di labamento di placa.
Diabierna merdia Huez-Comisario a trata e prolongacion di detencion di e dos sospechosonan aki.
Decision a ser tuma, cu tanto Benny Sevinger y su casa Claudia lo keda den detencion pa awor na interes di e investigacion.
