ORANJESTAD (AAN): Marc Figaroa, Director di Aruba Port Authority (APA N.V.) a duna di conoce cu mundo crucero aworaki ta recuperando na e nivelnan prome cu 2019. Manera ta conoci, e pandemia a afecta drasticamente y a dura 16 luna prome cu Aruba por a mira un
barco atrobe cu turista riba waf.
Figarora a agrega cu despues di un comienso turbulento na 2022 door di Omicron a perde e prome temporada di 'high-season' 2022. Pero despues a drenta den 'low-season' y ta apenas na october-november cu Aruba a drenta den e 'high-season' pa e temporada 2022-2023 unda cu ta mira e temporada ey uno hopi satisfactorio cu e grado di ocupacion abordo cu a subi.
Por wak e prome kwartaal di 2023 unda tin te hasta mas barco y mas pasahero compara cu 2019, pero ta bay drenta e temporada abao. Aworaki e impacto cu por ehempel, Pullmantur no ta operando mas ya cu el a bay bancarota durante e temporada di pandemia. Nan tabata bin Aruba tur siman, a indica.
E director di APA N.V.. a sigui bisa cu aworaki ta sinti e impacto ey y e aña aki ta prome biaha cu tur destinacion rond mundo ta habri y durante di e pandemia tin e companianan cu a deshaci di varios barco, principalmente e barconan bieu ineficiente. Esaki ta nifica cu tin menos barco ta operando.
Esey a haci cu aworaki ta sinti e impacto di 'low-season' caminda tin menos barco cu normal. Tambe tin e impacto di e temporada di Alaska caminda tur hende ta purba di bay y manda nan barco ora cu e temporada di Alaska ta habri. Esey tambe ta afecta e cifranan pa loke ta Caribe, a laga sa.
Banda di esaki tin destinonan cu a habri bek manera China, New Zealand, Australia, Hapon. Esaki ta e paisnan cu tabata tin e restriccionnan cu e fronteranan tabata cera pa cruceronan of e rekisitonan pa crucero tabata hopi mas stricto unda cu aworaki esaki a wordo elimina.
Despues di october e 'high-season' ta bay ta fuerte atrobe y ta bay mira e cantidad di barconan subi atrobe. Ta bayendo di mas o menos 5 pa 8 barco pa luna, pero despues di esaki por subi na 37 casi 50 barco pa luna, Marc Figaroa a indica.
E diferente di 'low-season' cu 'high-season' ta hopi grandi y ta sinti'e tambe den loke ta infrastructura. Dia 30 tabata tin 3 barco y tabata tin mas di 11.600 turista crusero. Y esaki lo bay wak bek banda di november - december, a agrega.
