ORANJESTAD (AAN): For di Diabierna caba, y tanto Diasabra como Diadomingo, Aruba henter a sinti e cayente di e calor intenso di mas di 32 grado Celsius y sin biento. Sinembargo pa e habitantenan di barionan di Mahuma, Buena Vista, Parkietenbos y Simeon Antonio mester a soporta mucho mas molester, fuera di e
calor sofocante.
Pa motibo cu biento a cay y a cambia di direccion, un holor stinki di e Dump di Parkietenbos a drenta den e casnan di barionan, pero tambe un holo diferente cu tambe ta hole malo di Ser’i Tijsji, a afecta e famianan di e barionan menciona. Apesar cu e dump di Parkietenbos ta cera, e ta emitiendo un holor vies y huma cu ta sali y afecta e bida di habitantenan, hende grandi y mucha ta worde mas afecta cu alergia, astma y hopi dolor di cabes. Varios ta e famianan cu a dicidi di sali di e bario durante dia pa evita di worde afecta pa e holor y gas toxico cu a sali di elugarnan menciona.
Otronan a cera nan mes den cas, pone serbette muha na e porta y bentana pa evita cu e holor malo ta drenta paden di cas. Segun e habitantenan ta informa, durante di e ultimo reunion cu e Minister di medio ambiente Sr. Ursell Arends y su conseheronan, nan e urgi e Minister pa cera e operacion di Ser’I Tijsji tambe mas pronto cu ta posibel.
Nan ta bisa cu nunca e habitantenan a aproba pa bin cu algo asina den area parti pariba di nan casnan na Ser’i Tijsji, e ta algo totalmente incorecto. Segun esnan di Stichting Parkietenbos, Ser’i Tijsji tabata suppose di tabata algo temporal na momento cu cera e dump pa despues bay over un Sanitary Landfill moderno y despues sigui pa un proceso pa procesa tur desperdicio cu ekiponan moderno cu efecto minimo pa medio ambiente y genera coriente alavez.
Pero ta parce cu awor nada di e plannan anuncia ta worde ehecuta. Mas bien Ser’i Tijsji ta birando e siguiente fuente di molester y sufrimento pa e habitantenan di e barionan concerni y tambe pa Aruba. Ayera diadomingo e holornan malo a bolbe yega te na Aeropuerto di Aruba y hustamente den oranan di merdia na momento cu un cantidad di buelo cu bishitantenan ta yega y bay di nos isla.
