Tur ultimo diahuebs di luna Stichting Rancho ta organisa 'Marshe Rancho'

ORANJESTAD (AAN):  Clifford Rosa, Presidente di Stichting Rancho a indica cu ultimo diahuebs di luna Fundacion Rancho na su centro di actividad ta organisa 'Marshe Rancho'.

Den cuadro di esaki a planifica pa semper tin un lectura pa educa comunidad den diferente tematica.

Desde 31 di Juli nan a habri cu un exposicion den e edificio ubica na Visstraat y a pensa kico tur ta bay haci y a planea pa organisa diferente charla.

Diahuebs ultimo tabata tin Natalia Maduro, cu ta un profesional den e parti di arte y terapia. El a duna informacion relaciona riba importancia di arte. Con arte por relaha y yuda sali for di cualkier molester cu bo por tin.

Manera ta conoci, e pandemia a crea situacionnan fastioso y pa yuda, por ehempel, por bay cana den naturalesa, disfruta di e beachnan, wak lama. Cosnan senciyo, Rosa a remarca.

Arte y terapia a duna un contexto riba kico por haci y con arte por yuda relaha, a agrega.

Marshe Rancho ta un plataforma pa e hendenan den bario. Eynan tambe por haya diferente cuminda crioyo cu ta relata na e parti culinario di Rancho. Banda di esey, ta dunando un espacio na e hendenan cu ta trahando productonan local, artistanan cu ta traha obra di man, entre otro.

Ta danki na e fondonan otorga pa Samenwerkende Fondsen y CEDE Aruba cu por crea e proyectonan aki di un forma structura, Clifford Rosa a indica.