Minister Dangui Oduber:
ORANJESTAD (AAN) — Minister di Salud y Turismo, Dangui Oduber a expresa, den conferencia di prensa, cu awo cu nos ta yegando na final di aña 2022, tin tur indicacion cu Aruba ta bay yega na e 100% di recuperacion, cu gobierno a pone como meta pa fin di aña 2022, no obstante cu a cuminza e aña cu 5 mil caso di Omicron.
E mandatario a indica cu den pleno pandemia a anuncia un strategia di salida, y a enfoca riba Aruba su turismo y a pone tur confianza cu e strategia lo duna e resultado cu gobierno tabata buscando na e momentonan ey.
“Awo cerando aña 2022, ya caba den luna di December, e ultimo proyeccionnan ta dunando indicacion, cu muy probablemente por bay logra recupera e 100% di nos turismo, locual sigur ta algo remarcable y excepcional cu despues di dos aña di pandemia, Aruba a demostra un resiliencia enorme pa nos por yega bek na 100% di recuperacion.
Aruba ta wordo reconoci mundialmente, pa e manera con nos ta maneha nos turismo post pandemia. Aruba, recientemente, a gana un premio cu cual a wordo reconoci, con e pais a maneha su turismo despues di e pandemia. Esaki ta un trabao di ekipo, conhuntamente cu ATA, cu ta e partner di mas importante, Ministerio di Turismo, APA, AHATA, y tur otro partners cu a yuda contribui pa Aruba logra un recuperacion di 100%, loke sigur ta algo sumamente positivo, pa Aruba su economia. Aruba su turismo a duna su economia un crecemento substancial, y esaki a haci cu Aruba por a para riba su propio pianan y no tabata tin mas e sosten di likidez di gobierno di Hulanda.
