Un generacion nobo mester disfruta di accionnan actual
*Nostalgia y motibo di negoshi mester topa den balansa
*Costo pa haci negoshi ta determinante pa comercio liber
ORANJESTAD(AAN)--Tempo a cambia. Mundo a cambia. Un realidad cu mester ta punto di salida den tur plan, sigur teniendo na cuenta cu den futuro, tempo y mundo lo sigui cambia.
Caya Grandi, Nassaustraat, Caya Betico Croes, ta nombernan cu ta haci hende analisa historia y e cambionan cu a presenta den transcurso di tempo.
Caya Grandi: e caya grandi cu a hunga un papel enorme den comercio di Aruba. Caya Grandi: e nomber cu Pueblo di Aruba a duna e caya cu oficialmente ta relata na e Cas Real di Reino Hulandes. Caya Betico Croes, nomber di e Arubiano cu a logra cambio estatal di su pais, autonomia, di su pais cu awe mester lucha pa e situacion financiero nacional, coresponde na Status Aparte.
Caya Grandi ta un monumento, cu mester keda bibo mescos cu e historia propio di San Nicolas, di Santa Cruz, di Noord y tur otro parti di Aruba.
E Aruba di awe ta basa riba lucha y logro di e pais, cu ta parti di un mundo di cambio y mester entrega na cada tempo, loke e tempo ta exigi.
E problema di Caya Grandi no ta unico. Na tur parti di mundo, cu a conoce cambionan grandi den e ultimo siglo, decisionnan mester wordo tuma con ta atende cu loke historia a laga atras y loke e generacion nobo ta anhela.
E mundo di negoshi, cu tabata crea tambe actividad social, pa e grupo di mas edad den comunidad, tin un sentimento emocional sigur den dianan di fiesta.
Ta e hecho cu publico tabata yena caya pa haci compra, tabata e atraccion grandi.
Mercancia tabata wordo presenta na peaton y hende den auto cu tabata gosa di e union di hende, pero tambe tabata bolbe pa haci compra den e centro comercial.
Tempo a cambia y shopping malls a haci nan entrada. Un ambiente diferente, cu na tur ciudad grandi, a afecta e realidad comercial cu mester a adapta su mes.
Pero e berdad grandi ta keda, cu placa pa comercio keda bibo, mester subi mesa. Pues, negoshinan di Caya Grandi mester produci placa.
Tin informantenan cu a presenta e opinion cu e caya mester keda habri te laat y ta wordo papia di situacionnan na otro pais.
Ora nos analisa tur ponencia, mester bay pone nostalgia y sentimento den balansa cu e placa cu e ta produci.
Comercio ta basa riba produccion di placa pa e existi. Esaki ta e prome realidad di un centro comercial, sea cu e ta caya of shopping mall.
Pa un lugar produci placa, e mester atrae publico pero cumpli cu loke ta necesario pa honra tur necesidad di e cliente.
Aki e rabo di porco ta krul.
Gobierno mester percura pa seguridad di tur hende. Mas negoshi habri durante mas hora, ta nifica mas Polis y di otro parti tambe personal di seguridad.
Iluminashon ta sumamente importante y pa comerciante y gobierno, e realidad di gasta mas na coriente, ta bini dilanti.
Haci negoshi ta nifica cu ta habri un negoshi pa gana placa. Esaki ta e profesion di un comerciante, cu mester paga empleado.
Aruba conoce leynan cu ta didici cuanto empleado ta gana y kico e areglonan basico di trabou ta. Nos ta papia aki pues di e gastonan laboral ya cu empleadonan ta hunga un papel sumamente importante cu e servicio cu nan ta ofrece den comercio.
Horario di trabou ta dicidi riba exigencia di transportacion di e trahador ora solo baha tambe.
Caya Betico Croes ta simbolo di tur loke nos ta analisa tur dia.
Prome cu Covid-19, ya nos tabata mustra riba e realidad mundial cu 2025 lo tabata temporada di cambio mundial, cu un generacion nobo cu ta reemplasa Baby Boomers cu a nace despues di Segunda Guera Mundial y a crea e mundo cu a culmina den Siglo 20.
Caya Grandi no ta wordo representa pa tram, pero realidad di e futuro cu ta exigi pa historia wordo prolonga cu futuro cu ya a cuminsa tambe pa Comercio, productor di placa, productor di trabou, na un pais liber.
Con comercio den Caya Betico Croes ta cubri su gastonan di haci negoshi, cu ta nifica cu e mester amplia su actividadnan y sigura cu nan por drenta futuro? Esaki ta e pregunta cu mester haya un contesta, pa e analisis por haya un conclusion.
