Edwin Jacobs, director di SVb ta reitera cu enfasis:
*Pero e reparatie toeslag e ta hay’e solamente si ta biba y ta registra na Aruba!
ORANJESTAD (AAN) — Edwin Jacobs, director di SVb, den entrevista cu Matutino DIARIO a reitera cu tur hende asegura na Aruba tin derecho riba pensioen, y esaki ta keda vigente na cualkier parti di mundo cu e bay (biba), y solamente e gastonan bancario ta core pa cuenta di e pensionado.
Un obligacion cu e pensionado tin si, ta notifica SVb cu e ta bay biba na otro pais, pasobra e ta perde su derecho na Reparatie Toeslag.
“E reparative toeslag ta un compensacion cu gobierno di Aruba ta duna, specificamente na pensionadonan biba akinan. El a subraya cu apart di e pensioen, e pensionado tin obligacion di informa SVb cu e ta bay biba afo. Nos ta haya informacion den cuadro di cooperacion cu Departamento di Censo, ora bo ta bay biba largo afo, y nos ta bin bek cobra bo ora cu bo ta bin bek. E por ta fastioso, p’esey nos ta haci un suplica na e persona cu ta bay keda mas cu seis luna afo, cu automaticamente e ta wordo saca afo di Registro Civil, pa informa SVb.
No pensa cu nos t’asina leu cu si bo bay informa un caminda tur ta informa; ainda no, den futuro si ta bay bira asina. P’aworaki bo tin cu informa SVb cu bo ta bay biba afo”, Jacobs a enfatiza.
El a indica cu e persona su cuenta por keda na Aruba y esey e ta regl’e cu su banco; si e kier cambia di banco e ta bay SVb y inform’e den cual banco e kier pa su pension wordo deposita. Gastonan bancario ta core pa cuenta di e pensionado.
Edwin Jacobs ta remarca cu pa e pensionado haya su reparatie toeslag, e mester biba na Aruba y ta inscribi den e Registro Civil akinan.
