Ramon Todd Dandaré a splica...
ORANJESTAD (AAN): Na ocasion di Dia di Tula, 230 aña despues di e rebelion balente na Corsou, Archivo Nacional di Aruba a invita pueblo pa reflexion y conocemento cu a tuma luga diasabra 16 di augustus 2025,.
Ramon Todd Dandaré, Magister den Linguistica, a presenta un charla titula “Anhelo di Libertad: Sclavitud y Resistencia”, pa honra e spirito di lucha contra opresion cu a marca pasado y ta sigui inspira presente.
Todd Dandaré a papia durante e charla aki riba varios rebelion. Siguientemente e descripcion di cada region.
Rebelion di catibo na Hispaniola
E prome Africanonan a yega Hispaniola, teritorio awor comparti pa Republica Dominicana y Haiti, na 1501, ora cu Gobernador a pidi permit pa trece e catibonan domestico cu ne. Pa 1520 mas di 2.000 catibo a yega y a parti nan pa traha riba e teranan, entre 150 y 400 homber pa cada cunucu.
E Di dos dia di Pasco di 1521, riba un di e prome plantacionnan di sucu estableci den Mundo Nobo, un grupo di catibo Africano a lanta contra nan doñonan den loke tabata e prome rebelion di catibo Africano na America.
E rebelion aki a tuma luga den loke awor ta Republica Dominicana, na un plantacion di sucu propiedad di Virey Diego Colon, yiu di Cristobal Colon, y a duna luga na e prome leynan di catibo na e continente.
Rebelion di Yanga na Mexico
Sclavitud di e poblacionnan Africano y e afrodescendientenan na Mexico tabata compaña pa movementonan di resistencia y rebelion. Hende cu tabata huy (cimaron) a busca nan libertad y miho condicion di bida. E region di Cordoba, na Veracruz, a experencia rebelion constante di catibo. E rebelion mas grandi den e region tambe ta esun mas famoso denter di historiografia di e tema y di historia nacional di Mexico: Rebelion di Yanga. E rebelion di Yanga, cu a dura hopi aña, di por lo menos 1590 pa 1630, a mantene e administracion colonial bou di control te ora cu, despues di un serie di negociacion, a logra reconocemento di e asentamento cimaron como un hurisdiccion liber.
Esaki ta hacie e movemento cimaron mas exitoso na Mexico, culminando den e fundacion di e ciudad liber San Lorenzo de los Negros, awe yama Yanga na honor di e cimaron Africano cu a dirigi e movemento.
Tanto e movemento di rebelion como e negociacionnan hiba pa e lider y su sucesornan cu e varios gobiernonan vireinal tabata sumamente compleho. E experiencia aki ta demostra cu bou di liderazgo capaz, e catibonan por a sostene un campaña gueriyero, negosha un tregua y gana reconocemento di nan libertad.
Resistencia activo contra e colonisadonan (Saint Vincent)
Na 1635 un grupo di catibo Africano, sobreviviente di dos barco Spaño cu a naufraga, a yega Saint Vincent y nan tabata e prome grupo no Americano cu a establece na e isla. Black Caribs of Garifuna, manera a defini e descendientenan di e union entre Africano y Caribe, tabata diferencia nan mes di e grupo original, exclusivamente Caribe of Yellow Caribs.
Tur e pueblonan ey tabata notabel pa motibo di nan resistencia combativo contra e colonisadonan Europeo, principalmente e Inglesnan, kendenan a intenta instala nan mes eynan.
Na 1763 e Inglesnan finalmente a sali victorioso y nan a consolida nan dominio riba Saint Vincent and the Grenadines. Pero, entre 1772 y 1773 a tuma luga conflicto nobo, conoci bou di e nomber di Prome Guera di Caribe y nan a obliga e Inglesnan pa hala atras.
Na 1795 Di dos Guera di Caribe a estaya, den cual a desafia e dominio Britanico seriamente. Despues di batayanan sangriento, na juni 1796 e Caribenan a mira nan mes forsa pa desisti di e lucha. Cerca di 5.000 nativo a rindi durante e proceso di negociacion.
E aña siguiente nan a deporta esnan cu a sobrevivi pa e isla di Roatan na Honduras y, posteriormente, nan a plama pa diferente punto di America Central. E tenacidad di e resistencia indigena a converti Saint Vincent den e ultimo isla di Caribe cu e Europeonan por a domina.
A lo largo di casi trescien aña e ferocidad di e Caribenan di Saint Vincent a desafia e Spañonan, e Francesnan y e Inglesnan. Nan resistencia di siglos a laga como herencia di e descendientenan directo e cultura Garifuna di e Caribenan preto, cu a extende su mes a traves di diferente pais di America Central despues di e deportacion di 1797.
Na maart 2002 nan a declara e gran hefe Caribe Chatoyer, mata na 1795, kende a lidera e guera contra e Inglesnan, e prome heroe nacional di Saint Vincente and the Grenadines.
Revolucion di Haiti
Na 1791 e unico revolucion di catibo exitoso den historia a tuma luga. Despues di un proceso duro y sangriento, Haiti a declara su independencia na 1804. Te e tempo ey e tabata un teritorio Frances colonial y di catibo den Caribe. El a bira e prome Republica Preto na mundo y a marca un punto di cambio pa cuminsamento di fin di sclavitud.
Na fin di siglo 18 Francia tabata uza trabou di catibo cu mas di 500.000 Africano dedica na produccion di catuna, indigo, koffie y sucu. E expectativa di bida riba e plantacionnan ey tabata alrededor di 10 aña unabes cu bo pone pia riba e isla como catibo. Sinembargo, e ideanan di Revolucion Frances tambe a crusa Ocean Atlantico y François Dominique Toussaint a dirigi un ehercito di catibo cla pa bringa pa nan libertad.
Nan a logra derota e forsanan manda pa e colonistanan blanco como represion y e exitonan a sigui. Francia a aboli sclavitud na 1794 y na 1804 e colonia a declara independencia, reclamando e nomber cu e nativonan tabatin pa e isla prome cu e yegada di e Spañonan: Haiti.
Riba potret: Escultura de Yanga na un localidad veracruzano
