ORANJESTAD (AAN): Durante un rueda di prensa diamars, Dr. Joost Samuels, Chief Medical Officer, di AZV a splica den un forma cortico kico a pasa cu e 'Lista
Positivo di Remedi'.
El a bisa cu e remedinan (zelfzorgmiddelen of di cuido propio) a wordo kita for di e lista. Tambe riba e lista tabata tin remedinan bieu cu no a wordo uza y no tabata disponibel mas na Aruba. Eseynan a wordo kita tambe.
Tabata tin remedinan cu a wordo kita pasobra tabata tin bon alternativa p'e, efectivo y mas barata. Banda di esaki tin un lista di criteria cu tin solamente entre 40 pa 50 remedi riba dje. Esey kiermen cu e remedinan ey por wordo uza pa malesanan of casonan specifico, Dr. Samuels a indica.
E cambio grandi ta riba e remedinan propio, cu ta e remedinan cu e asegurado por cumpra cu ta 'over the counter' (OTC) y cu no tin mester di un receta pa esey. Esey por ta un tiki dificil pa e pashentnan si nan kier sigui uza esey, a remarca. Pero pa esakinan tin alternativa tambe.
"Mi mag bisa cu tur pashent cu tin mester di nan remedi pa cierto problemanan of malesanan, nan tur ta haya nan remedi. Dus, e no ta asina cu pashentnan ta keda sin remedi. E remedinan tey, e remedinan por wordo prescribi y tin alternativo p'e tambe", e Chief Medical Officer di AZV a enfatisa.
